کندهار (پژواک، ٢١ لړم ٩٥): د کندهار د يو شمېر شمالي ولسواليو اوسېدونکي وايي چې په دې وروستيو کې په هلمند او اروزګان کې د جګړو له پراخېدو سره په دغو ولسواليو کې امنيتي ګواښونه ډېر شوي دي.
خلک وايي، په دې وروستيو کې پر امنيتي پوستو د وسله والو بريدونو زور اخيستى او دغه راز د سړک غاړې د ماينونو چاودنې ډېرې شوې چې ډېر مهال په کې ملکي وګړو ته مرګ ژوبله اوړي.
دوى وايي، ان داسې اوازې او خبرونه يې هم اورېدلي چې غورک ولسوالۍ ته په سلګونو وسله وال له وسلو او هغو پوځي وسايطو سره راغلي چې په هلمند او اروزګان کې يې له امنيتي ځواکونو نيولي او غواړي د يادو شوو ولايتونو په څېر جګړه دې ولايت ته هم وغځوي.
ځايي مسوولين او د ولايتي ادارې چارواکي په دغو ولسواليو کې ګواښونه مني، خو وايي هومره جدي او د اندېښنې وړ ځکه نه دي چې له امنيتي ځواکونو سره د خلکو مرسته ډېره ده او د ځپلو توان يې لري.
غورک د کندهار په شمال کې پرته تر ټولو ناامنه ولسوالۍ ده چې له کندهار ښار څخه د شاوخوا ١٠٠ کيلومتره په واټن واقع ده.
دغه ولسوالۍ له هلمند او اروزګان ولايتونو سره پولې لري چېرې چې له تېرو څو مياشتو راهيسې د امنيتي ځواکونو او وسله والو تر منځ درنې جګړې دوام لري.
د دې ولسوالۍ يوه اوسېدونکي محمد سرور اکا چې تازه يې خپل يو ناروغ د درملنې لپاره کندهار ښار ته راوستلى پژواک خبري اژانس ته وويل، کلونه وشول چې له غورک څخه کندهار ته غځېدلې لار وسله والو بنده کړې او خلک په ډېر تکليف پر اوږدو او پېچلو لارو کندهار ښار ته سفر کوي.
ده زياته کړه، په دې وروستيو کې د هلمند او اروزګان له جګړو سره په دې ولسوالۍ کې امنيتي وضعيت خراب شوى او د وسله والو بريدونه ډېر شوي دي.
اکا دا هم وويل چې داسې خبرونه يې اورېدلي چې له اروزګان او هلمند وروسته ډېرى وسله وال له وسلو او هغو پوځي موټرو سره چې د يادو شوو ولايتونو په جګړو کې يې نيولي، دې ولسوالۍ ته راغلي او غواړي جګړه کندهار ته هم وغځوي.
نوموړى له حکومت څخه غواړي چې وار له مخه دې د وسله والو د ډېرېدونکو فعاليتونو مخنيوى وکړي، ځکه وروسته به يې مخنيوى ګران کار وي.
د غورک په ګاونډ کې د نېش ولسوالۍ چې له کندهار ښاره شاوخوا ١٦٠ کيلومتره لرې پرته ده، يوه اوسېدونکي محمد حنيف هم پژواک خبري اژانس ته وويل چې په دې وروستيو کې دغلته نه يواځې پر امنيتي پوستو بريدونه ډېر شوي، بلکې د ماين چاودنې هم ډېرې شوي چې هم پوليسو او هم ملکي وګړو ته په کې مرګ ژوبله اوړي.
د ده په باور، همدا د دې معنا لري چې وسله والو مخالفينو يو ځل بيا په شمالي ولسواليو کې خپل فعاليتونه ډېر کړي دي.
دى وايي، داسې شپه به نه وي چې له غورک او شاوليکوټ ولسواليو سره د نېش ولسوالۍ پر سرحدي پوستو بريدونه نه کېږي، چې پوليسو ته مرګ ژوبله هم په کې اوړي.
ميانشين ولسوالي هم د کندهار له شمالي ولسواليو څخه ده چې د دې ولايت له مرکز څخه ٧٠ کيلومتره لرې ده او له اروزګان او زابل سره پولې لري.
د دې ولسوالۍ يو اوسېدونکى تاج محمد وايي چې ډېرى مهال له شاوخوا ولسواليو څخه وسله وال راځي او د دې ولسوالۍ پر امنيتي پوستو بريدونه کوي.
نوموړى له حکومت څخه غواړي چې په ولسواليو کې دې د امنيتي ځواکونو تشکيل ډېر او پر وخت اکمال شي، ولسواليو ته پر غځېدلو لارو دې د امنيتي پوستو شمېر ډېر شي او پراخ عمليات دې تر سره شي.
له يادو شوو ولسواليو سره په څنګ کې په شاوليکوټ ولسوالۍ کې هم امنيتي ګواښونه ډېر شوي او څو اوونۍ مخکې وسله والو دغلته شاوخوا يو کيلومتر پوخ سړک هم اړولى و.
د دې ولسوالۍ اوسېدونکي هم له ناامنۍ سر ټکوي او وايي د سړک غاړې ماينونه يې د ژوند پر وړاندې لوى خنډ دي او له همدې امله ډاډه تګ راتګ، کار او روزګار نه شي کولى.
د خلکو د اندېښنو په اړه د غورک ولسوال حاجي دارو خان پژواک ته وويل، غورک ولسوالۍ هلمند او اروزګان ولايتونو ته څېرمه پرته ده چې په دې وروستيو کې د وسله والو مخالفينو له خوا له ګواښ سره مخ ده خو بيا هم د دې ولسوالۍ له ٥ حوزو پر ٢ يې دوى واک لري.
ده زياته کړه، جدي ستونزه له کندهار ښار څخه غورک ته د غځېدلې لارې د بندېدلو ده چې ان ګڼې کورنۍ مجبورې شوې چې خپل کورونه او کلي پرېږدي، ځکه وسله والو ورباندې هر ډول توکي بند کړي وو.
نوموړى هم وايي چې وخت په وخت يې له ولايتي ادارې او امنيتي مسوولينو سره ستونزې شريکې کړي او هغوى ته يې ويلي چې غورک ته دې پام وشي، د امنيتي ځواکونو تشکيل دې ډېر شي او دې ولسوالۍ ته غځېدلې لاره دې خلاصه شي.
څو اوونۍ وړاندې په دې ولسوالۍ کې وسله والو د ملي اردو پر دوو قرارګاوو بريد وکړ او د سختې جګړې په پايله کې په لسګونو د ملي اردو سرتېري ووژل شول.
ولسوال وايي، وسله والو اوس لايزر او دروبين لرونکي پرمختللې وسلې تر لاسه کړي او د دغو وسلو په مټ امنيتي ځواکونو ته درنه مرګ ژوبله اړوي.
د ده په خبره، ډېر مهال وسله وال له ميوند، خاکرېز او د هلمند له کجکي ولسواليو څخه راځي او په پوره شدت پر امنيتي پوستو بريدونه کوي چې امنيتي ځواکونه يې د څارلو امکانات او وسايل نه لري، ځکه خو يې د مخنيوي لپاره جدي تدابيرو ته اړتيا ده.
د نېش ولسوال حاجي حيات الله پژواک خبري اژانس ته وويل، نېش د ارزوګان د ترينکوټ، خاکرېز، شاوليکوټ او ميانشين ولسواليو په منځ کې پرته ده، په داسې حال کې چې شاوخوا يې سختې جګړې روانې دي، خو توانېدلي چې د دې ولسوالۍ امنيت خوندي وساتي.
دى وايي، د دې ولسوالۍ خلک له حکومت سره همکار دي او نه غواړي چې په ولسوالۍ کې دې يې ناامني وي، ځکه خو په شاوخوا کې يې له سختو جګړو سربېره د دغې ولسوالۍ امنيت ښه دى.
نوموړي زياته کړه، پر نېش کمربندي پوستې را تاو دى چې د وسله والو د بريدونو پر وړاندې سخت مقاومت کوي، خو بيا هم دغلته د پوليسو د تشکيل د ډېرېدو اړتيا ده.
دى هم وايي چې نېش ته غځېدلې خرابه لاره هم د امنيت په خرابوالي کې رول لري، په کار ده چې حکومت دغه سړک ژر تر ژره جوړ کړي.
د ميانشين ولسوال اغا نور بيا پژواک اژانس ته وويل چې د دوبي په موسم کې د وسله والو له خوا امنيتي تهديدونه ډېر وو، خو اوس چې هوا په يخېدو ده، تهديد ورسره کم شوى دى.
دى هم وايي چې وسله والو ډېرې هڅې وکړې چې امنيتي پوستې سقوط کړي، خو امنيتي ځواکونو يې پر وړاندې سخت مقاومت کړى دى.
د ده په خبره، دغه ولسوالي د زابل او اروزګان تر منځ پرته ده او له همدې دوو ولايتونو څخه وسله وال د بريدونو لپاره راځي.
د شاوليکوټ ولسوال حاجي عبدالغني وويل، چې وسله والو په دې وروستيو کې د ماينونو خښولو ته زور ورکړى، خو پوليس هره ورځ له ٤ تر ٥ ماينونه کشف او له منځه وړي.
دى وايي، همدا تېره ورځ د دې ولسوالۍ په تمبکول سيمه کې د ملکي وګړو پر موټر چاودنه وشوه چې ٣ ماشومان، ٢ ښځې او ٢ نارينه يې ووژل چې ټول د يوې کورنۍ غړي وو.
د کندهار د والي وياند صميم خپلواک پژواک خبري اژانس ته وويل، د کندهار هغه ولسوالۍ چې هلمند او اروزګان ته څېرمه پرتې دي او دغه راز هغه ولسوالۍ چې پر ډيورنډ کرښه پرتې دي، رښتيا هم امنيتي تهديدونه په کې شته.
دى وايي ، وسله وال تل په دغو ولسواليو کې پر امنيتي پوستو بريدونه کوي او په لارو کې ماينونه خښوي، خو د امنيتي ځواکونو له خوا يې مخنيوى کېږي او پر وړاندې يې درېدلي دي.
خو نوموړى وايي چې په کندهار کې له امنيتي ځواکونو سره د ولس مرسته ډېره ده او په همدې بنسټ هغوى توانېدلي چې د وسله والو د فعاليتونو مخنيوى وکړي.
د ده په خبره، ډېرو دغو ولسواليو ته غځېدلې لارې خرابې دي چې د امنيت د خرابېدو يو لامل هم همدا ويجاړې لارې دى، له همدې په استفاده وسله وال په لارو کې ماينونه خښوي چې هم پوليسو او هم ملکي وګړو ته مرګ ژوبله اړوي.
دى وايي، ولايتي اداره پر همدې کار کوي چې د امنيت د لا ښه ټيګښت او د خلکو د ژوند د ژغورنې په موخه ولسواليو ته غځېدلې لارې جوړې شي چې د ځينو سروې روانه ده او د ځينو لارو لپاره پيسې منظور شوې دي.
هغه د بېلګې په توګه د کندهار- اروزګان لاره ياده کړه چې د جوړولو لپاره يې ١،٨ ميليونه ډالر ځانګړي شوي چې له جوړولو سره به يې د شاوخوا ولسواليو او په خپله د اروزګان په امنيتي وضعيت کې ښه والى راشي.
دغه لاره له شاوليکوټ، ميانشين او نېش ولسواليو څخه تېرېږي.
خپلواک دا هم وويل چې امنيتي ځواکونه شپه او ورځ په ولسواليو کې عمليات تر سره کوي، څو د وسله والو د فعاليتونو مخنيوى وکړي.
غړيYou need to subscribe to view the full article. Please login or register a new account.










