جلال اباد (پژواک، ۲۴ لړم ۹۵): د کرنې او مالدارۍ وزارت له خوا د ننګرهار ولايت اته زره بزګرو ته د څلور سوه ميټريک ټنه د غنمو تخم او د يوزرو دولس ميټريک ټنه کيمياوي سرې د ويش لړۍ پيل شوه.
د ننګرهار د والي وياند عطاءالله خوږياڼي د لړم په ۲۴مه پژواک اژانس ته وويل، په پام کې ده چې د مرکز په ګډون په ټولو ولسواليو کې د کوپراتيفونو شامل بزګرو ته د غنمو اصلاح شوی تخم او سره ووېشي.
د نوموړي په وينا، د دغه ولايت له بزګرو سره د کرنيزو تخمونو او کيمياوي سرو مرسته او کومک کولای شي چې د کورني اقتصاد پياوړتيا او ځان بساينې ته زمينه برابره کړي.
د اصلاح شوي تخم او کيمياوي سرې د وېش لړۍ پرون د بهسودو له ولسوالۍ پيل شوه چې پر مهال يې د کرنې او مالدارۍ رييس پوهنمل رفيع الله رحيمزي وويل چې د کرنې او مالدارۍ وزارت په پام کې لري چې د دغه ولايت له بزګرو سره د څلور سوه ميټريک ټنو په اندازه اصلاح شوی تخم او يو زرو دولس ميټریک ټنه کيماوي سره ووېشي چې پيل يې د بهسودو ولسوالۍ له بزګرو کوي.
د نوموړي په وينا، ټاکل شوی تخم په هېوادنۍ کچه يو منل شوی او د حاصلاتو له پلوه ښه جنسيت ګڼل شوی. د ده په ټکو کيمياوي سره د هېواد توليد دی چې په مزارشريف ښار کې جوړېږي.
د بهسودو ولسوال محمد صديق دولتزي او يو شمېر قومي مشرانو له بزګرو سره د تخمونو او کيماوي سرو مرسته په کرنيزه برخه کې د ځان بساينې په تړاو مهمه هڅه په ګوته کړه او له اړوند مسوولينو يې غوښتنه وکړه چې د کرنيزو حاصلاتو د لوړولو په موخه شوې مرسته څو چنده لوړه کړي.
بلخوا د مرستې ترلاسه کوونکي يو بزګر احمد ګل وويل چې دا مرسته به له دوی سره د کروندو په ښه والي او د دوی د اقتصاد په غوړېدا کې ښه مرسته وکړي.
هغه غوښتنه وکړه چې حکومت دې د بزګرانو د ژوند ښه والي لپاره ورته نورې برنامې جوړې کړي، تر څو د دوی ستونزې ورسره حل شي.
غړيYou need to subscribe to view the full article. Please login or register a new account.










