جلال اباد (پژواک، ۱۴ مرغومى ٩٥): د ننګرهار ولايت چارواکي وايي چې د دوربابا ولسوالۍ د اوسېدونکو د غوښتنو پر اساس يې دغې ولسوالۍ ته ۴۵ نوي ښوونکي ګومارلي دي.
تر دې وړاندې به استادان له جلال اباد ښار څخه دور بابا ته راتلل او هلته به يې زده کوونکو ته زده کړې ورکولې.
دوربابا د ننګرهار هغه ولسوالي ده چې خلکو يې امنيت خپله تامين کړی؛ خو د پوهنې، روغتيا او رغونې په برخه کې له بېلابېلو ستونزو شکايت لري.
پر دغو مشکلاتو د پژواک خبري اژانس په ګډون يو شمېر رسنيو راپورونه خپاره کړل او ستونزې يې د ننګرهار تر والي ورسولې.
د ننګرهار د والي وياند عطاءالله خوږياڼي د مرغومي په ۱۴مه پژواک ته وويل چې پرون د والي محمد ګلاب منګل په لارښوونه د پوهنې ریاست له لوري په دوربابا ولسوالۍ کې د یادې ولسوالۍ ۴۵ تنه ښوونکي په بېلابېلو ښوونځیو کې پر دندو وګومارل شول .
هغه زياته کړه چې د یادو ښوونکو د ګومارنې په موخه دوربابا ولسوالۍ کې ازموینه واخیستل شوه چې په کې د دوولسم، څوارلس او لیسانس تر کچې ۶۶ فارغینو ګډون کړی و.
خوږياڼی وايي، د یادې ازموینې له لارې ۴۵ تنه چې د دوربابا ولسوالۍ اوسني استوګن دي، بریالي شوي چې په یاده ولسوالۍ کې په بېلابېلو ښوونځیو کې پر دندو وګومارل شول .
د دوربابا ولسوالۍ د ځوانانو د شورا مشر رڼا ګل شينواري له پژواک سره په خبرو کې دې ولسوالۍ ته د نوو ښوونکو د ګومارلو چاره تاييد کړه؛ خو وايي چې لا تر اوسه ښوونکو دنده نه ده پيل کړې.
هغه وايي چې اوسمهال ښوونځي رخصت دي او تر رخصتۍ وروسته ورسره ولايتي ادارې او پوهنې رياست ژمنه کړې چې ټول ۴۵ ښوونکي به دندو ته ورځي.
د دور بابا ولسوالۍ اوسېدونکي حاجي کفتر خان پژواک ته وويل چې تر دې وړاندې به استادان له جلال اباد ښار څخه دور بابا ته راتلل او هلته به يې زده کوونکو ته زده کړې ورکولې.
هغه وايي: ((کله به استادان په وخت نه رسيدل، کله به بيخي نه راتلل چې دا زموږ لپاره يو لوى مشکل و، خو اوس ښه شو چې زموږ له ولسوالۍ څخه استادان وټاکل شول.))
د هغه د معلوماتو له مخې، دا چې دې ولسوالۍ استادان نه درلودل نو د پوهنې برخه يې هم ډېره کمزورې ده او ان ښوونځيو ته يې ودانۍ هم نه دې جوړې شوي.
د يو بل خبر له مخې، د ننګرهار په اچين ولسوالۍ کې د ګل اصغر په نوم لېسه چې د داعش وسله والو له لوري تړل شوې وه، له يو نيم کلن ځنډ وروسته د زده کوونکو پر مخ پرانيستل شوه.
د ننګرهار ولايت مقام د رسنيو له دفتر څخه نن پژواک ته په راستول شوې خبرپاڼه کې راغلي چې دغه لېسه پرون د يوې غونډې په ترڅ کې چې د اچين ولسوالۍ مسوولينو، ديني عالمانو، قومي مشرانو، د سيمې اوسېدونکو او زده کوونکو په کې برخې لرله يو ځل بيا فعاله شوه.
خبرپاڼه کاږي چې په جوړه شوې غونډه کې د اچين ولسوال عيسی خان ځواک وويل چې شاوخوا يو نيم کال وړاندې داعش وسله والې ډلې په ياده ولسوالۍ کې د نورو ظلمونو تر څنګ دغه لېسه د زده کوونکو پر مخ وتړله.
ولسوال د تړل شوې لېسې پر پرانيسته خوښي ښکاره کړه او هم يې د پوهنې رياست له مسوولينو غوښتنه وکړه چې يادې لېسې ته درسي مواد په واک کې ورکړي او هم يې تجهيز ته پاملرنه زياته کړي.
خبرپاڼه زياتوي چې د يادې ولسوالۍ د پوهنې مدير ميريم او قومي مشر شان پاچا د خبرو پر مهال د زده کوونکو پر مخ د يادې لېسې پر بيا پرانيسته خوښي وښوده او هم يې له اړوندو ادارو غوښتنه وکړه چې د دې ولسوالۍ پوهنيز بهير ښه والي ته ځانګړې پاملرنه وکړي.
د اچين ولسوالۍ امنيې قوماندان سمونمل احمدشاه او د يادې ولسوالۍ د سيمه ييزو پوليسو قوماندان سيد جلال ولسونو ته ډاډ ورکړ چې د امنيت ټينګښت په موخه به خپلې هڅې لا چټکې کړي او زده کوونکو ته به د زده کړې ښه زمينه برابره کړي.
د يادولو ده، د ننګرهار اچين ولسوالۍ کې شاوخوا دوه کاله وړاندې د داعش وسله والو د بريدونو او په دې ولسوالۍ کې د جګړو له امله ډېری ښوونځي تړل شوي وو؛ خو اوس يې د ګوتو له شمېر پرته نور ټول بېرته پرانيستل شوي دي.
غړيYou need to subscribe to view the full article. Please login or register a new account.










