کندهار (پژواک ١٨ کب ٩٥): د علامه اکاډميسين عبدالشکور رشاد د دولسم تلین په یاد دوه ورځنۍ څېړنغونډه په کندهار ښار کې جوړه شوه.
د هېواد او سیمې د دغه وتلي عالم، لیکوال، څېړونکي او ژبپوه په اړه، دغه دوې ورځنۍ څېړنغونډه د کندهار ولایت مقام، اطلاعاتو او فرهنګ ریاست، کندهار پوهنتون، ټرانسپورټ ریاست، کندهار ښاروالۍ او افکو کمپنۍ په هڅو جوړه شوې ده.
دې څېړنغونډې ته د کابل، ننګرهار او څو نورو ولایتونو تر څنګ له ډهلي، پېښور او کویټې څخه د پښتو ژبې وتلي لیکوال، څېړونکي او پوهان رابلل شوي، چې په کې استاد حبیب الله رفیع، څېړنوال عبدالغفور لېوال، پروفیسر خالق رشید، استاد لال پاچا ازمون، زرین انځور او په لسګونو نور شامل دي.
ټاکل شوې ده، په دغې دوې ورځنۍ څېړنغونډه کې لیکوال او پوهان د علامه عبدالشکور رشاد د شخصیت، فکر، اثارو او د ژوند پر نورو اړخونو مقالې وړاندې کړي.
د څېړنغونډې لومړۍ برخه پیغامونو ته ځانګړې شوې وه.
په پیل کې د کندهار پوهنتون علمي مرستیال او د پاچا خان څېړنیز مرکز مشر انجنیر شېر شاه رشاد وینا وکړه.
رشاد په پيل کې له هغو ادارو مننه وکړه چې دغه څېړنغونډه یې جوړه کړې او له هېواد او له هېواد څخه بهر یې لیکوال، پوهان او څېړونکي ورته رابللي دي.
هغه زیاته کړه، دا د یوه فرد نمانځنه نه ده، بلکې دا د هېواد د هغه پېر نمانځنه ده، چې هر فرد یې ویښ زلمی و، د ټولنې په رمزونو پوهېدل، د چا په خوږو او ترخو نه غولېدل او د واک لپاره یې د چا مرییتوب نه کاوه.
د ده په وینا، علامه رشاد د هېواد او سیمې په کچه همداسې یوه عالم، څېړونکی او لیکوال و چې د علم او پوهې په برخه کې یې ډېر تت اړخونه راڼه کړي او په دې برخه کې په لسګونو علمي اثار ټولنې ته وړاندې کړي دي.
ده وویل، دغسې شخصیتونه هم په ژوند کې د قدر او ستایلو وړ وي او هم باید له مړینې وروسته په ښه نوم یاد شي.
رشاد ژمنه وکړه چې په دې څېړنغونډه کې وړاندې کېدونکې علمي مقالې به ژر چاپ او تر فرهنګي کړیو او اشخاصو به یې ورسوي.
د ولسمشر اشرف غني پیغام د هغه د سلاکار استاد لال پاچا ازمون له خوا وړاندې شو.
په پیغام کې د علامه رشاد په اړه د یادې شوې څېړنغونډې د جوړولو ستاینه شوې وه او استاد یې خپل همعصر داسې عالم او معلم بللی و چې په خپلو لیکنو کې یې ځوان نسل ته افغاني او ملي روحیه ورکړې ده.
په پیغام کې راغلي و، استاد په ډېرو بدو شرایطو کې چې په کابل کې د اور سکروټې ورېدې، له هېواده و نه ووت، بلکې کور یې د علم او پوهې مرکز پاتې شو.
ولسمشر یادونه کړې وه چې استاد رشاد هومره ارزښتمن علمي اثار خپلې ټولنې ته وړاندې کړي چې د پوهې ډېر مرکزونه، پوهنځي او پوهنتونونه ورڅخه ګټه اخلي.
په پیغام کې ځوان نسل ته سپارښتنه شوې وه چې د استاد اثار په ژوره توګه مطالعه کړي او نوې څېړنې ورباندې وکړي.
د کندهار ښاروال انجنیر روښان ولسمل د کندهار د والي ډاکټر محمد همایون عزيزي پیغام وړاندې کړ او ویلي و، چې د عالمانو او پوهانو پر ژوند دغسې څېړنغونډې جوړول د ټولنې په وګړو کې له پوهې او پرمختګ سره مینه او لېوالتیا پیدا کوي.
په پیغام کې راغلي و، چې د دغسې پوهانو نمانځنه د دولت او ملت دواړو مسوولیت دی؛ په کار ده د هېواد د وتلو پوهانو، لیکوالو او ملي شخصیتونو پر افکارو څېړنې وشي او تر خلکو ورسول شي څو له دې لارې د ناخوالو، جګړو او افراطیت مخنیوی وشي.
د کندهار د اطلاعاتو او فرهنګ رییس حضرت ولي هوتک د اړوند وزارت د سرپرست وزیر پوهنوال رسول باوري پیغام وړاندې کړ.
د ده په پیغام کې راغلي و چې پوره دولس کاله وړاندې افغانستان یو داسې پوه له لاسه ورکړ چې تشه یې تر اوسه نه ده ډکه شوې.
د وزیر د پیغام له مخې، علامه رشاد د هېواد او سیمې په کچه داسې یوه څېره وه چې د ادب، فرهنګ، تاریخ او په ځانګړې توګه د عروضو په برخه کې نه ستړي کېدونکي خدمتونه کړي دي.
نوموړي له ادبي کړيو او اشخاصو غوښتي و چې ورته علمي غونډې او سيمینارونه نور هم جوړ شي.
د غونډې په دغې لومړۍ برخه کې په هېواد کې دننه او له هېواده بهر د علمي او فرهنګي ټولنو پیغامونه هم وړاندې شول.
وروسته د غونډې دویمه برخه پيل شوه چې د علامه رشاد د افکارو او اثارو په اړه د لیکوالو، پوهانو او څېړونکو لیکلو مقالو ته ځانګړې شوې ده.
په دې برخه کې څېړنوال عبدالغفور لېوال، پروفیسر خالق رشید او نورو لیکوالو خپلې مقالې ولوستې او د سبا لپاره به هم دا لړۍ روانه وي.
ټاکل شوې ده، په دې لړ کې یو واټ او یو کتابتون هم د پوهاند اکاډیمیسن عبدالشکور رشاد په نوم ونومول شي.
علامه عبدالشکور رشاد د افغانستان او سيمې په کچه د ادب او فرهنګ په برخه کې پېژندل شوې څېره ده چې په بېلابېلو علمي څانګو کې ۱۳۸ چاپ او ناچاپ اثار لري.
د معلوماتو له مخې، د استاد ۴۹ اثار د هغه په ژوند او ۳۰ د هغه له ژوند وروسته چاپ شوي دي.
غړيYou need to subscribe to view the full article. Please login or register a new account.
