<p>کابل (پژواک، ٢ ورى ٩٦): ولسمشر غني وايي، نوى کال به د بزګرو او مالدارو لپاره ښه کال وي، ځکه د اوبو کچه زياته شوې او له امله به يې د للمي ځمکو حاصلات ٤٠ سلنه زيات شي.</p>
<p>له ارګ څخه پژواک خبري اژانس ته په رالېږل شوې خبرپاڼه کې راغلي، چې ولسمشر محمد اشرف غني نن ماسپښین د نوي لمریز کال د نمانځنې مراسمو کې چې د هېواد د لومړۍ مېرمن د دفتر له لوري په ارګ کې ترسره شول، ګډون او وینا وکړه.</p>
<p>سرچينه کاږي، په دې مراسمو کې یو شمېر فعالو ښځو هم حضور درلود، د هېواد لومړۍ مېرمن د خپلو خبرو پرمهال ټولو هېوادوالو په ځانګړي ډول ښځو ته د نوي کال مبارکي وویله او هیله یې څرګنده کړه، چې وروستي ورښتونه به افغانستان زرغون کړي او دایمې سولې او ثبات ته به ورسېږي.</p>
<p>هغې د نوروز د نمانځنې مراسمو اساسي موخه د افغانستان د خلکو د پخواني فرهنګ ژوندي ساتل چې د خلکو تر منځ د احساساتو د انتقال وسیله کېږي، وبلله.</p>
<p>نوموړې وویل، د مثبتو فرهنګونو په بسنټي کولو سره پرمختللې او سالمه ټولنه لرلای شو.</p>
<p>ولسمشر هم په دې مراسمو کې خبرې وکړې، یو ځل بیا یې ټولو هېوادوالو په ځانګړي ډول ښځو ته د نوي کال او د پسرلي د پیل مبارکي وویله.</p>
<p>هغه په هېواد کې وروستیو ورښتونو ته په اشارې وویل، په تېرو ۲۵ کالو کې د اوبو کچه دغومره نه وه او نوی کال به بزګرو او مالدارو ته ښه کال وي.</p>
<p>ده څرګنده کړه، سږکال به د للمي ځمکو حاصلات ۴۰ سلنه زیات شي او هیله ده، چې زموږ د خلکو کورونه له الهي نعمتونو څخه ډک شي.</p>
<p>نوموړي زيات کړه، راتلونکی کال به د حکومت زیات تمرکز ښوونې او روزنې او همدارنګه امنیت ته وي.</p>
<p>په یادو مراسمو کې شفیقې حبیبي، نجیبې ایوبي او ځینو نورو د نوروز په اړه خبرې وکړې او د فرهنګ او هنر پیاوړتیا ته یې د هېواد د لومړۍ مېرمن د پاملرنې مننه او قدرداني وکړه.</p>
<p>په دې مراسمو کې د نوروز په اړه لنډ کلیپونه، د لیکوالۍ د جایزو د ګټونکو پېژندنه، د هېواد کتابتونونه، محلي سندرې، د موزیم، ملي ارشیف او دارالامان ماڼۍ تاریخچه ګډون کوونکو ته وړاندې شوه.</p>
<p>په پای کې ځینو ګډونوالو د نوي کال په مناسبت شعرونه وویل او دا مراسم ځینو فعالو ښځو ته د ستاینلیکونو په ورکولو سره پایته ورسېدل.</p>
