ګردېز (پژواک، ٥ ورى ٩٥): په پکتيا کې داسې مهال نوى ښوونیز کال پيل شوى چې د دغه ولايت يوازې په يوه ولسوالۍ کې د نجونو ١٤ ښوونځي د نا امنۍ له امله تړل شوي دي.
د وري په پنځمه د پکتيا په مرکز کې د نوي ښوونیز کال د پيل په موخه ځانګړي مراسم نیول شوي وو.
په دې غونډه کې د پکتيا د پوهنې رييس کوچي ځاځي وويل چې سږ کال به زده کوونکي د کـتابونو د نشتوالي يا ناوخته ور رسېدو ستونزه ونه لري او راتلونکې اونۍ به له پلازمېنې کابل څخه د پکـتيا ټول کـتابونه ور ولېږدول شي.
خو کوچي وويل چې د پکـتيا تر ټولو په لويه زرمت ولسوالۍ کې اوس هم د نا امنۍ له امله د نجونو ١٤ ښوونځي تړلي دي.
نوموړي وويل: ((موږ د پکـتيا يوازې په زرمت ولسوالۍ کې ستونزې لرو، په زرمت کې زموږ ۱۴ ښوونځي تړلي چې ابتدائيه او متوسطه مکاتب په کې شامل دي؛ موږ يې د قومي مخورو او د سيمې د خلکو په مرسته د پرانيستلو جدي هڅې پيل کـړې دي.))
هغه وويل چې د پکتيا په پاتې نورو ١٢ ولسواليو کې د ښوونځيو د تړل کېدو ستونزه نه لري.
پوهنې وزارت د ۱۳۹۶ کال لپاره پکـتيا ته د ۲۰زره نوو زده کوونکو د جذب هدف ورکړی چې نيمايي به يې نجونې وي او ولايتي مسوولين هيله من دي چې ورکړل شوی هدف به ترلاسه او هڅه به وکړي چې د نوو زده کوونکو د جذب شمېر تر دې هم زيات کړي.
په دې غونډه کې د پکـتيا والي زلمي ويسا د زده کړو په کيفيت، ښوونځيو ته د ودانيو په جوړولو او د ښوونځيو د اړتيا وړ وسايلو او امکاناتو په برخو کې شته ستونزې او نيمګړتياوې يادې کړې او هيله يې څرګنده کړه چې اړوند وزارت او ادارې به يې د حل لپاره کوټلي ګامونه واخلي.
ويسا د زرمت د تړلو ښوونځيو په اړه اندېښنه وښوده او ويې ويل چې د پرانيستو لپاره يې هڅې روانې دي.
هغه وویل: ((موږ د ډېرو نورو په څېر په تعليمي برخه کې هم ډېر مشکلات لرو، زموږ اکثريت ښوونځي ودانۍ نه لري، د مکتبونو لپاره د اړتيا وړ ډېر وسايل نشته او له ډېره تاسفه بايد ووايم چې د ځينو مشکلاتو له امله مو په زرمت کې ډېر ښوونځي بند دي.))
دغه راز د پکـتيا د ولايتي شورا غړي محمدرحمن قادري وويل چې د پکـتيا د پوهنې اوسنی حالت ډېر نا مناسب او د اندېښنې وړ دی.
نوموړی وايي: ((پوهنه اساسي برخه ده، له موږ سره په دې برخه کې هم توپيري چلند شوی؛ زموږ تعليمي حالت د منلو نه دی، پکـتيا ډېر زيات کار ته اړتيا لري او موږ جدي غوښتنه کوو چې تعليم ته خاص پام وشي.))
دمګـړۍ د پکـتيا په مرکز او ولسواليو کې کابو ۱۹۰زره زده کوونکي ښوونځيو ته ځي چې شاوخوا ۵۰ زره يې نجوني دي او د څه باندې ۴زره ښوونکـو له خوا زده کړې ورکول کېږي.
په پکـتيا کې ۳۶۲ ښوونځي شته خو سره له دې چې شاوخوا ۲۰۰ يې ودانۍ نه لري.
غړيYou need to subscribe to view the full article. Please login or register a new account.










