غزني ښار (پژواک، ١٤ غويي ٩٦): په غزني کې خبريالان شکايت کوي چې اړوند مسوولين ورسره پر وخت معلومات نه شريکوي نو ځکه د خبر جوړولو پر مهال له ستونزو سره مخ کېږي.
بل لور ته د غزني چارواکي وايي چې له دې وروسته به خبريالانو ته پر وخت او کره معلومات ورکوي.
د غويي په ١٤مه په غزني ښار کې د خبريالانو او حکومتي چارواکو تر منځ د مطبوعاتو خپلواکۍ ورځې په مناسبت غونډه جوړه شوې وه.
په ياده غونډه کې د خبريالانو په استازيتوب د بي بي سي خبريال اسدالله جلالزي وويل چې د غزني والي تر اوسه يو فعال وياند نه لري او نور چارواکي هم پر وخت خبريالانو ته معلومات نه ورکوي.
هغه زياته کړه: ((کله چې له کوم چارواکي سره اړيکه وکړو، نو يا ټيلېفون بل چا ته ورکوي او يا هم وايي چې وروسته زنګ ووهه.))
هغه وايي چې دغه ډول کړنې د خبريالۍ کارونه له ستونزو سره مخ کوي او خبريالان بيا نه شي کولاى چې پر وخت راپورونه چمتو کړي.
جلالزي دا هم وويل چې د نور هېواد په څېر په غزني کې هم د خبريالانو ژوند خوندي نه دى او ډېرى وخت د بېلابېلو کسانو او ډلو له خوا ګواښل کېږي.
په غزني کې بل خبريال رحمت الله مرجانخېل وويل چې په غزني کې ستونزې ډېرې دي نو ځکه چارواکي هم ځانونه له خبريالانو پټوي.
هغه پر چاراوکو نيوکه وکړه چې يوازې هغه معلومات له خبريالانو سره شريکوي چې تشريفاتي او يا هم د دوى په ګټه وي.
يو شمېر نور خبريالانو په هم په دې غونډه کې ورته خبرې وکړې.
په دې غونډه کې د غزني والي عبدالکريم متين وويل چې خبريالانو ته د معلوماتو ورکولو په موخه به ډېر ژر يو فعال وياند وګوماري.
هغه وويل: ((ځيني موضوعات دي چې بايد له رسنيو سره شريک نه شي خو موږ تر خپله وسه هڅه کوو چې تر دې وروسته معلومات شريک کړو.))
دغه راز د غزني امنيه قوماندان مل پاسوال امين الله امرخېل وايي که څه هم له کابل څخه پرې بنديز لګول شوى چې خبريالانو ته به معلومات نه ورکوي خو دی څه کوي د پېښو په اړه معلومات له خبريالانو سره شريک کړي.
هغه زياته کړه: ((يوازې زه نه، بلکې تول امنيتي ځواکونه د خبريالانو په خدمت کې دي او هر وخت معلومات ورکوي.))
د غونډې په پاى کې د غزني حکومتي چارواکو خبريالانو ته ژمن ليک هم ورکړ چې له مخې به يې حکومتي چارواکي له خبريالانو سره معلومات شريکوي.
د يادونې ده، د مې درېيمه نېټه په ټوله نړۍ کې د مطبوعاتو د خپلواکۍ نړيواله ورځ ده چې دا ورځ د افغانستان په بېلابېلو برخو کې ونمانځل شوه.
غړيYou need to subscribe to view the full article. Please login or register a new account.
