کندهار (پژواک، ۲۰ غبرګولی ۹۶): په کندهار کې د کانکور په ازموینه کې د دوولسم ټولګیو ۳۸۰۰ تنو فارغانو ګډون کړی وو چې په دې ډله کې ۵۲۵ تنې نجونې وې.
که څه هم په سږنۍ کانکور ازموینه کې د تېر په پرتله د نجونو د ګډون کچه لوړه ده خو مسوولین یې کافي نه بولي او وايي لوړو زده کړو ته د نجونو د هڅولو لپاره کار کوي.
د ۳۸۰۰ فارغانو له ډلې ۱۹۰۰ یې نن ازموینه ورکړه او ۱۹۰۰ به یې سبا ورکړي.
د کندهار والي تورنجنرال زلمي ویسا د کانکور ازموینې د پیل پر مهال وویل : (( زموږ بنسټیزه دنده دا ده چې د کانکور ازموینه باید رڼه او شفافه وي.))
ده زیاته کړه، د کانکور ازموینه باید د زده کړو د کیفیت پر بنسټ واخیستل شي، په هغو ځایونو کې چې د زده کړو کچه لوړه ده، د کانکور کچه باید لوړه او چېرې ستونزې وي د ازموینې پر مهال باید پام ورته وشي.
هغه خوښي وښودله چې کال په کال د کانکور په ازموینه کې د ځوانانو د ګډون کچه لوړېږي، خو ویې ویل چې د نجونو ونډه باید ډېره شي.
په سږني کانکور کې د ۳۸۰۰ ګډونوالو له ډلې ۵۲۵ نجونې وې چې د دې شمېرې شاوخوا ۸ سلنه جوړوي.
د کندهار پوهنتون رییس ډاکټر حضرت میر توتاخېل خوښي وښودله په ځوانانو کې د لوړو زده کړو سره مينه ډېره شوې او په زرګونو ځوانان د کانکور په ازموينه کې برخه اخلي.
هغه زیاته کړه، د ازموينې د شفافيت په موخه اړين ګامونه پورته شوي او اسانتياوې ډېرې شوې دي.
ده که څه هم د کانکور په ازموینه کې د نجونو ونډه تر پخوا ډېره وګڼله، خو د قناعت وړ یې و نه بلله.
دی وايي، اړوندې ادارې او خلک باید په ګډه کار وکړي چې نجونې زده کړو ته وهڅوي، اسانتیاوې ورته برابرې کړي، څو هغوی په کانکور کې پراخ ګډون وکړي او لوړو زده کړو ته لار پیدا کړي.
د کندهار د ښځو چارو رییسه هم د کانکور په ازموینه کې د نجونو کمه ونډه د اندېښنې وړ بولي او وايي په دې برخه کې دې د خلکو تر منځ پر عامه پوهاوي ډېر کار وشي.
مېرمن رقیه اڅکزۍ وايي، د کانکور په ازموینه کې د ۵۲۵ نجونو ګډون د د کانکور د ټولو ګډون کوونکو ۸ سلنه هم نه جوړوي.
دې زیاته کړه،له بده مرغه په کندهار کې ډېرې نجونې د کلتوري او ټولنيزو مسايلو له مخې په شپږم او يا اووم ټولګي کې زده کړې بس کوي او د نورو زده کړو فرصت نه ورکول کېږي.
د دې په خبره، تېر ته په کتو بیا هم هم حالت ښه شوی دی، خو لا ډېر کار ته اړتیا ده چې نجونې د هلکانو په څېر د زده کړو جق او اسانتیاوې ولري.
د کانکور برخه والو د کانکور پروسه شفافه ګڼله او ویل یې چې د نقل او جعل کولو د مخنيوي په موخه هر ازموينه ورکوونکي ته بېلې پوښتنې او پاڼې ترتيب شوې وې.
ځینو شکایت کاوه چې هر کال ګڼ شمېر زده کوونکي د کانکور په ازموينه کې بې نتيجې پاتې کېږي، په کار ده اړوند مسوولين دې ستونزې ته پاملرنه وکړي.
ارشاد احمد چې سږ کال تازه له دوولسم ټولګي فارغ شوی او د کانکور په ازموینه کې یې ګډون کړی، پژواک ته وویل، د ازموینې پروسه ښه وه، یوازې د بایو میټریک پر مهال څه نا څه ستونزې وې، ځکه ګڼه ګوڼه ډېره وه.
د سلیم په نوم یوه بل زده کوونکي وویل، پوښتنې سختې وې، په کار ده هرې سیمې ته د زده کوونکو له سویې سره سمې پوښتنې راوړل شي.
دغه راز ده یادونه وکړه چې هر کال ګڼ شمېر زده کوونکي د کانکور په ازموينه کې بې نتيجې پاتې کېږي، په کار ده اړوند مسوولين دې ستونزې ته پاملرنه وکړي.
د جمیلې په نوم یوې نجلۍ پژواک اژانس ته وویل خوشاله ده چې د کانکور ازموینه ورکوي او د لوړوړ زده کړو د پیلولو په موخه لومړی ګام اخلي.
دې زیاته کړه، د ځان او کورنۍ په غوښتنه یې طب پوهنځی انتخاب کړی او هيله یې وښودله چې هومره نمرې پوره کړي او یادی شوی پوهنځی ولولي.
د یادونې ده چې تېره ورځ د کندهار په ګاونډ اروزګان او زابل ولایتونو کې هم سلګونو زده کوونکو د لوړو زده کړو په موخه د کانکور ازموینه ورکړه.
غړيYou need to subscribe to view the full article. Please login or register a new account.










