کابل (پژواک، ٢٩ چنګاښ ٩٦) : اوس هم له رسنيو حقايق پټيږي او کله چې کومه رسنۍ د خپلو سرچينو په حواله حقايق خپروي، نو له فشارونو او ګواښونو سره مخامخ کېږي.
د دا ډول حقايقو پټولو وروستۍ بېلګه په بلخ ولايت کې د مزار شريف د مولانا جلال الدين بلخي هوايي ډګر کې د ولسمشر د لومړي مرستيال عبدالرشيد دوستم د الوتکې په اړه وه، چې د کېناستو اجازه نه وه ورکړل شوې.
دوستم چې په څارنوالۍ کې د جنسي تېري او تاوتريخوالي دوسيه هم لري، شاوخوا دوه مياشتې مخکې ترکيې ته تللى و، خو کله چې د روان لمريز کال د چنګاښ په ٢٧مه، د شپې په شاوخوا ٩ بجو بېرته هېواد ته را ستنېده؛ نو د مزار شريف په هوايي ډګر کې يې الوتکې ته د کېناستو اجازه نه وه ورکړل شوې.
د بلخ ولايت يوې معتبرې سرچينې پژواک اژانس ته ويلي وو چې په دغه هوايي ډګر کې مېشتو الماني ځواکونو د ولسمشر اشرف غني په لارښوونه د دوستم الوتکه پرې نښوده چې کېني.
يادې سرچينې داهم ويلي وو چې د بلخ والي عطاء محمد نور له يوه لوى پلاوي سره د دوستم د ښه راغلاست لپاره هوايي ډګر ته تللى و.
د دغه خبر تر خپرېدو وروسته د عبدالرشيد دوستم او عطاء محمد نور دفترونو د خبرپاڼو په خپرولو سره د پژواک خبر رد کړ او تور يې پورې کړ چې ګوندې پژواک اژانس بې بنسټه خبر خپور کړ.
دغه راز د دوى پلويانو په ټولنيزو شبکو کې پژواک اژانس پسې بد رد ويل او يو ډول نيوکې او ګواښونه يې هم کول چې پژواک يې له ځانه سره اسناد ساتلي دي.
د عبدالرشيد دوستم وياند بشير احمد تينج دغه خبر رد کړى او ويلي يې دي چې دوستم به په نږدې راتلونکي کې هېواد ته ستون شي.
بلخوا د بلخ د والي وياند منير فرهاد دا مني چې له ترکيې يوه الوتکه د مزار هوايي ډګر ته رسېدلې وه، خو زياتوي چې د تخنيکي او فني ستونزو له امله بېرته ترکمنستان ته ولاړه.
هغه پژواک اژانس ته وويل، دغه الوتکه د درېيو دقيقو لپاره د افغانستان فضا ته داخله شوې وه، خو بېرته عشق اباد او بيا له هغه ځايه ترکيې ته ولاړه.
نوموړى ادعا کوي چې په دې الوتکه دوستم نه، بلکې ترکي انجينران وو چې په مزار شريف کې د يوې پروژې د کارونو لپاره راتلل.
په کابل کې د ناټو ځواکونو وياند سالوين پژواک اژانس ته وويل، د دوى ځواکونه د دوستم د الوتکې د کېناستو په مخنيوي کې ښکېل نه وو.
هغه زياته کړه : " دا د افغان ځواکونو او افغان حکومت مسووليت دى چې له خپل هوايي حريم څخه ساتنه او پرېکړه وکړي، چې کومو الوتکو ته د کېناستو او يا نه کېناستو اجازه ورکړي."
بلخوا بي بي سي او امريکا غږ هم ناټو او دوستم ته د نږدې سرچينو په حواله خبر ورکړى و چې په ياده الوتکه کې جنرال دوستم هم سپور و.
د ناټو وياند بېل سالوين امريکا غږ راډيو ته ويلي و: " د دوستم الوتکې ته د مزار په هوايي ډګر کې د کېناستو اجازه نه وه ورکړل شوې، په دې اړه له موږ څخه د مرستې غوښتنه شوې وه، خو دغې موضوع موږ پورې اړه نه لرله، ځکه موږ مداخله ونه کړه."
کله چې پژواک اژانس د ناټو له وياند څخه په دې اړه پوښتنه وکړه، نو هغه وويل، د امريکا غږ راپور دقيق دى.
د پژواک خبري اژانس مشر دانش کړوخېل وايي چې که څه هم په تېرو ١٦ کلونو کې د رسنيو په برخه کې لاسته راوړنې ډېرې دي، خو لا هم رسنۍ اطلاعاتو ته دلاسرسي او د حقايقو په خپرولو کې له ستونزو سره مخ دي.
هغه زياته کړه : " د ناسم خبر له خپرولو سره په خپله د رسنۍ حيثيت ته زيان رسيږي، يوه ملي رسنۍ هېڅکله نه غواړي چې بې اساسه راپور خپور کړي.
د کړوخېل په وينا، د دوستم د الوتکې د خبر تر خپرېدو وروسته، تر هغه چې ناټو او نورو سرچينو تاييد کړ، پژواک تر قوي فشار او ګواښ لاندې و.
نوموړى وايي چې اوس هم رسنۍ د بېلا بېلو کړيو له خوا تر فشارونو لاندې دي او نه شي کولى په ازاده توګه حقايق خپاره او په وخت سره کره اطلاعات ترلاسه کړي.
د افغانستان د ژورنالېستان د دفاع کمېټې رييس عبدالمعيد هاشمي وايي چې اطلاعات او حقايق نه يواځې له ژورنالېستانو او رسنيو پټ ساتل کېږي، بلکې له تېرو دوو درېيو کلونو راهيسې پر رسنيو او ژورنالېستانو کاري ساحه هم تنګه شوې ده.
هغه پژواک اژانس ته وويل، پخوا به خبريالان لرو پرتو سيمو او ولسواليو ته د راپورونو چمتو کولو لپاره تلل، خو اوس له ښارونو نه شي وتلى چې له امله يې ډېرى حقايق پټ پاتې کېږي.
نوموړي پر حکومت نيوکه وکړه چې ډېرى کارونه يې تر غونډو او کاغذونو پورې محدود وي او رسنيو ته د اطلاعاتو ورکولو په برخه کې يې هېڅ عملي اقدام نه دى کړى.
د افغانستان د خبريالانو د مرکز مشر احمد قريشي وايي چې خپلواکې رسنۍ بايد د يوه موثق خبر تر خپرولو وروسته تر فشار او ګواښ لاندې رانه وستل شي.
هغه وايي،پژواک اژانس د دوستم د الوتکې د خبر تر خپرولو وروسته په يو نه يو ډول تر فشارونو لاندې راغلى و.
د هغه وينا، د ټولنيزو رسنيو د قانون له مخې، د دولت په ګډون هېڅ حکمي يا حقيقي شخص نه شي کولى چې د رسنيو پر وړاندې خنډونه پيدا کړي، يا يې فعاليتونه محدود کړي او يا يې په چارو کې لاسوهنې وکړي.
قريشي وايي، دغه راز هېڅوک حق نه لري، يوه رسنۍ چې د بېلا بېلو سرچينو په حواله يې خبر خپور کړى وي، چې د دوى ګټې تر ګواښ لاندې راولي، پرې فشار راوړي او يو ډول ګواښونه ورته رامنځته کړي.
ده زياته کړه، د افغانستان د خبريالانو مرکز پر رسينو هر ډول فشار راوړل او ګواښل غندي له ټولو غواړي چې د رسنيو د فعاليتونو پر وړاندې خنډونه رامنځته نه کړي.
د سياسي چارو کارپوه جاوېد غفور وايي چې معلوماتو ته د لاسرسي په اړه ولسمشر اشرف غني حکم ورکړى او چارواکي مکلف دي چې په دغه برخه کې له رسنيو سره همکاري وکړي.
هغه پژواک اژانس ته وويل، ولسمشر د بيان ازادۍ ته ژمن دى، څو ځله يې له مطبوعاتو غوښتي چې د فساد پر ضد او نورو مبارزو کې ورسره همکاري وکړي.
غفور وايي، د ديموکراسۍ د اصل په اساس ټول بايد د بيان ازادۍ ته درناوى ولري او د مافيا پر وړاندې جدي مبارزه وکړي.
غړيYou need to subscribe to view the full article. Please login or register a new account.
