منځپانګې ته تلل
چهارشنبه ۱۸ نومبر ۲۰۲۶ · کابل ۲:۳۲ غ.و
۱۴°صاف · ↑۱۴° ↓۱°د هوا کیفیت: منځنی
غړي

د پاکستان د ٧٠٠ تحصيلي بورسونو لپاره د ازموينې لړۍ پيل شوه

· ۲ دقیقې لوستل · ۱۰۰ کتنې

کابل (پژواک، ٧ زمرى ٩٦): د پاکستان د سلګونو تحصيلي بورسونو لپاره له زرګونو افغان زده کوونکو د ازموينې لړۍ پيل شوه.

په کابل کې د پاکستان د سفارت مطبوعاتي اتشه اختر منير د زمري په ٧مه، پژواک خبري اژانس ته وويل، چې د ازموينې دا لړۍ پرون پيل شوې او څلور ورځې به دوام ولري.

هغه زياته کړه چې دا ازموينې په کابل، جلال اباد، کندهار، هرات او مزارشريف ښارونو کې اخيستل کېږي.

د نوموړي د معلوماتو له مخې، د دې بورسونو لپاره شاوخوا اته زره افغان زده کوونکو د ان لاين له لارې نوم ليکنه کړې وه او دوى ټولو ته  د ازموينې لپاره خبر ورکړى و.

اختر منير وايي چې د دې ازموينې اخيستو او ترې د نظارت لپاره له اسلام اباده د پاکستان د لوړه زده کړو د خپلواکې ادارې يو پلاوى هم کابل ته راغلى دى.

د دغه پلاوي مشر او د لوړو زده کړو ادارې سلاکار سيد وسيم هاشمي پژواک خبري اژانس ته وويل چې حکومت د پنځو کلونو لپاره افغان محصلينو لپاره درې زره بورسونه اعلان کړي وو.

هغه زياته کړه چې هر کال به شاوخوا اوه سوه افغان محصلين پاکستان ته د لوړو زده کړو لپاره لېږل کېږي.

هاشمي وايي چې د لومړي ځل لپاره دوى د ليسانس تر څنګ د ماسترۍ او دوکتورا په کچو هم سکالرشيپونه ورکړي دي.

نوموړي وويل چې د سږني اووه سوه بورسونو لپاره له ټول افغانستان څخه شاوخوا اتو زرو کسانو نوم ليکنه کړې وه او دوى ټول یې د ازموينې لپاره غوښتي دي.

د هغه په وينا، دا بورسونه د طب، انجنيرۍ، حقوق، اقتصاد، فارميسي، کمپيوټرساينس او نورو پوهنځيو په برخو کې دي.

د پاکستان د لوړه زده کړو د خپلواکې ادارې سلاکار وايي چې دغو بورسونو ته بريالي شوي افغان محصلين به د پاکستان د لومړۍ درجې دولتي پوهنتونونو کې جذبېږي.

د نوموړي په وينا، دوى به د افغان محصلينو فيس، د روغتيا لګښت، د ليليې او ډودۍ د لګښتونو تر څنګ مياشتنۍ جېب خرج هم ورکوي.

هاشمي وويل چې پخوا ګڼ شمېر افغان محصلين به ناکامېدل خو اوس دوى ورته پلان جوړ کړى چې تر لوړو زده کړو مخکې شپږ مياشتنى د ژبې کورس پرې ووايي.

نوموړي زياته کړه چې د دې ازموينې پايلې به يوه مياشت وروسته اعلان شي او دوه مياشتې وروسته به يې درسونه پيل شي.

د محمدعابد په نامه يو تن محصل له پاکستان څخه مننه وکړه، چې افغان محصلينو ته يې د لوړو زده کړو زمينه بربره کړه.

هغه زياته کړه، چې ازموينه په شفافه توګه ترسره شوه، خو ګيله يې وکړه، چې سوالونه يې ډير سخت جوړ کړي وو.

 

غړي

You need to subscribe to view the full article. Please login or register a new account.

اړوند خبرونه

ټول ښوونه او روزنه