جلال اباد (پژواک، ۵ سلواغه ۹۶): د ننګرهار دیني عالمان په ټوله اسلامي نړۍ کې د ځانمرګو بریدونو تر سره کول او د مسلمانانو وژل ناروا عمل یاد کړ او جلال اباد ښار کې د ماشومانو د ساتنې پر ادارې ترهګریز برید يې د اسلامیت او انسانیت ضد عمل وګاڼه.
د ننګرهار ولایت مرکز د جلال اباد ښار په درېيمه حوزه کې، تېره ورځ د ماشومانو د ساتنې پر ادارې ځانمرګي او ډله ییز برید ۳۰ تنو ته مرګ ژوبله اړولې وه، چې د يادو بریدونو د غندنې په موخه د سلواغې په ۵مه ديني عالمانو مطبوعاتي کنفرانس ورکړ.
د ننګرهار د حج او اوقافو ريیس مولوي عبدالظاهر حقاني او نورو دیني عالمانو د خبرو پر مهال د خلکو په منځ کې چاودنې د اسلامي احکامو په رڼا کې حرامې وبللې او عاملین يې د اسلام له دایرې وتلي یاد کړل .
ده زياته کړه، د اسلامي احکامو پر بنسټ پر ماشومانو شفقت او ترحم د هر انسان دنده ده، برعکس پر دوی ظلم حرام دی، خو په وینا یې د ماشوم د ساتنې پر ادارې برید د نړیوالو استخباراتي شبکو دسیسه ده او ټینګار یې وکړ، چې دښمن نه غواړي چې افغانستان پر ځان بسیا شي.
نوموړي پر ولسونو غږ وکړ چې د وسله والو مخالفینو پر وړاندې دې په کلکه ودرېږي او د خپلو امنیتي ځواکونو ملاتړ دې وکړي.
په ورته وخت کې ديني عالم مولوي نثار احمد پاچا بیا وايي، د هېواد او اسلام دښمنان نه غواړي چې افغانستان له روان بحران څخه ووځي.
دی زياتوي، له خپل هېواد نه دفاع کول تر ټولو غوره عمل دی، باید افغانان په اتفاق د دې هېواد ساتنه کې فعاله ونډه واخلي.
نوموړي پر عامو خلکو غږ وکړ چې د شکمنو کړنو لیدلو پر مهال دې افغان امنیتي ځواکونو ته خبر ورکړي.
یو بل دیني عالم مولوي حبيب الله وويل، د الله(ج) د لارښوونې له مخې د یو انسان وژل په اصل کې د ټول انسانیت وژنه ده .
د ده په وينا، افغانانو په ډېرو سيمو حکومت کړی دی او هيچا ته به تسليم نه شي او له ټولو علماء کرامو او هېوادوالو یې وغوښتل، چې سره يو شي او د هېواد دښمنانو مخه ونيسي.
د ننګرهار دیني عالمانو، تېره ورځ د امنیتي ځواکونو له لوري د ماشومانو د ساتنې ادارې د ۴۵ کارکوونکو د ژوندي ژغورلو له امله قدرداني او ستاینه وکړه.
د دغه بريد مسووليت داعش وسله والې ډلې منلى دى .
غړيYou need to subscribe to view the full article. Please login or register a new account.
