کندهار (پژواک، ۱۹ سلواغه ۹۶): کندهار مېشتو خبریالانو د کندهار له ولایتي ادارې وغوښتل چې د کلید راډیو د پخواني مسوول احمدالله څرګند د نیول کېدو او د هغه له دفتره د چاودېدونکو توکو څخه د ډک مایک د موندلو موضوع دې په دقیقه او بې پرې توګه وڅېړل شي.
ژورنالېست او په کندهار کې د کلید راډیو پخوانی مسوول احمدالله څرګند شاوخوا درې نیم میاشتې مخکې د ملي امنیت ادارې له خوا نیول شوی چې تر دې مهاله یې د نیول کېدو په اړه په رسمي توګه معلومات نه دي ورکړل شوي.
خو د کندهار د امنیې قومندانۍ چارواکو خبر ورکړ چې تېره ورځ یې د کلید راډیو د پخواني مسوول احمد الله څرګند له دفتره له چاودېدونکو توکو ډک مایک تر لاسه کړی چې غوښتل یې لوړ پوړي امنیتي چارواکي پرې په نښه کړي.
د دې او ځینو نورو موضوعګانو په اړه نن په ولایت مقام کې د کندهار د والي زلمي ویسا په مشرۍ یوه غونډه جوړه شوې وه چې د خبریالانو تر څنګ په کې د ولسمشر مرستیال ویاند دواخان مینه پال هم ګډون کړی و.
د کندهار والي زلمي ویسا وویل، که څه هم احمدالله څرګند شاوخوا درې نیمې میاشتې وړاندې د ملي امنیت د ادارې له خوا نیول شوی خو تېره ورځ یې له دفتر څخه یو مایک تر لاسه شوی چې له چاودېدونکو توکو ډک و.
هغه زیاته کړه، په دې موده کې د هغه دفتر د ملي امنیت له خوا قلف شوی و خو کله چې تېره ورځ پرانیستل شوی او پلټل شوی، دغه مایک ورڅخه ترلاسه شوی دی.
دی وايي، په دې اړه وار له مخه د امنیتي ارګانونو له خوا ده ته معلومات ورکړل شوي وو چې د ژورنالیست په نوم یو څوک غواړي له ده سره مرکه وکړي او له چاودېدونکو توکو څخه د ډک مایک په وسیله هغه په نښه کړي.
دی وايي چې دغه موضوع تر څېړنې لاندې ده چې نور جزئیات به یې وروسته له رسنیو سره شریک کړای شي.
خو د کندهار د امنیې قوماندانۍ مرستیال ویاند مطیع الله هلال بیا پژواک اژانس ته وویل چې د دغه مایک په وسیله د کندهار امنیه قوماندان جنرال رازق په نښه کېده.
په دې غونډه کې په سوېل کې د خبريالانو د خونديتوب د کمېټې سيمه یيز مسوول او د کندهار د خبريالانو د مرکز مشر احمد لودين وويل،د دې موضوع د سپيناوي لپاره دې د خبريالانو د استازو په ګډون يو تحقيقاتي کمېسيون وټاکل شي، څو روښانه شي دا موضوع څومره حقيقت لري؟
هغه د کندهار له والي او امنیتي ارګانونو وغوښتل چې تر پلټنو او سپيناوي مخکې د داسې موضوعاتو خپراوی د رسنيو او خبريالانو په اړه د خلکو باور ته زیان رسوي.
نوموړي د دې تر څنګ معلوماتو ته د نه لاسرسي په اړه د خبریالانو ستونزې هم شریکې کړې چې ګواکې یو شمېر ادارې پر وخت خبریالانو ته معلومات نه ورکوي.
په سوېل کې د (نی) ساحوي دفتر مشر سميع غيرتمل هم د احمدالله څرګند د نیول کېدو او هغه ته د منسوب شوي مایک د دقیقې پلټنې او څېړنې غوښتنه وکړه.
د کندهار پریس کلب مشر جاوېد تنویر هم اندېښنه وښوده چې د احمدالله څرګند د نیول کېدو په اړه ضد او نقیض څرګندونې کېږي چې ذهنونه یې مغشوش کړي دي.
هغه هم د دې موضوع پر دقیقې پلټنې او څېړنې ټینګار وکړ.
د کندهار والي زلمي ویسا د خبریالانو د څرګندونو په ځواب کې ژمنه وکړه چې د موضوع اړوند به دقیقه او شفافه څېړنه کېږي.
هغه زياته کړه، دښمن له هرې ممکنې لارې خپلو هدفونو ته د ځان رسولو هڅه کوي، نو ځکه باید له ډېر احتیاط څخه کار واخیستل شي.
د ولسمشر مرستيال وياند دواخان مينه پال هم د خبریالانو غوښتنې او اندېښنې یاداښت کړې او له رسنیو وغوښتل چې د خپلو کارکوونکو په استخدام کې له دقت څخه کار واخلي.
هغه زیاته کړه، د خبریالانو د هر ډول قانوني موضوعاتو د حل هڅه کوي.
غړيYou need to subscribe to view the full article. Please login or register a new account.
