جلال اباد (پژواک، ٦ کب ۹۶): د پښتو ژبې د نومیالي لیکوال او څېړونکي عبدالله بختاني خدمتګار جنازه په جلال اباد ښار کې ادا او په سره رود ولسوالۍ کې د خپل پلرني کلي په هدیره کې خاوره ته وسپارل شوه.
ارواښاد عبدالله بختانی د ور پېښې ناروغۍ له امله، پرون په کابل کې له دې فاني نړۍ سترګې پټې کړې او نن د کب په ۶مه يې د جلال اباد په شېرزي لوبغالي کې د جنازې لمونځ ادا شو او په خپل پلرني کلي بختان کې خاورو ته وسپارل شو.
د نوموړي د جنازې په مراسمو کې د ننګرهار والي ګلاب منګل، د لغمان والي اصف ننګ او پر ځايي چارواکو سربېره ګڼ شمېر فرهنګیانو، لیکوالو، د ادب مينه والو او د نوموړي خپلوانو او دوستانو ګډون کړی و.
په ټولنیزو او علمي چارو کې د ولسمشر سلاکار او د کابل پوهنتون استاد دوکتور لعل پاچا ازمون وویل، پښتو ژبه اوس کلونو، کلونو ته اړتیا لري چې په خپله غېږ کې د عبدالله بختاني خدمتګار په څېر بل اولاد وزېږوي.
هغه زياته کړه: ((نن ماتم دی، بیا ډېر کلونه په کار دي چې دا ملت استاد بختانی پیدا کړي.))
د سرحدونو او قبایلو چارو وزارت مرستیال عبدالغفور لېوال وویل، ارواښاد بختاني د دوو لویو روښنفکرو نهضتونو سرلاری پاتې شوی و، خپل کار یې له ژورنالېزمه پیل کړی و او همداراز د یو دیني عالم په توګه یې ادبیاتو ته کار کړی دی.
د ارواښاد استاد بختاني مشر زوی نصرالله بختاني وویل، د ادب او شعر له لارې یې پلار خپل ولس ته خدمت کړی او نن یې د جنازې په مراسمو کې د خواخوږو د ګډون له امله د خدمت پایله ګوري چې له همدې امله یې د جنازې مراسمو له ټولو ګډونوالو څخه مننه وکړه.
د ننګرهار والي محمد ګلاب منګل د خبرو پر مهال د ارواښاد بختاني پر مړینه خواشیني وښوده، د مرحوم کورنۍ، خپلوانو او ټولو هېوادوالو ته یې د تسلیت مراتب وړاندې کړل.
نوموړي زیاته کړه، ارواښاد بختانی د ويښ زلمیانو مخکښ او د خدایي خدمتګارانو د نهضت پلوی او لاروی و چې د عدم تشدد او تاوتریخوالې پر وړاندې یې په ټول ژوند کې د ادب، شعر او لیکنې په برخه کې کلکه مبارزه کړې ده .
د لغمان والي اصف ننګ وویل، ارواښاد بختاني ټولنې ته د ژوند د سمون په موخه په ميليونونو انسانانو ته خپل اثار د لارښود په توګه پرېښودل او همداراز یې د لغمان ولایت د مسوولینو او ولسونو د خواخوږۍ پیغام شریک کړ.
سرمحقق عبدالله بختانی خدمتګار یوه نیمه لسیزه د افغانستان د علومو اکاډمۍ غړی و.
بختانی د یوې اوږدې ناروغۍ له کبله د ۹٣ کالو په عمر ومړ او په پښتو او دري ژبو یې شاوخوا ۱۳۰ علمي، څېړنیز او نور اثار په میراث پرېښودل.
بلخوا په کابل کې د پاکستان سفارت د استاد بختاني په مړينه، ژوره خواشیني څرګنده کړې ده او کورنۍ ته یې د تسلیت مراتب وړاندې کړي دي.
د سفارت له خوا په خپره شوې خبرپاڼه کې راغلي چې استاد بختانی د دواړو د ولسونو ترمنځ د پول حیثیت درلود.
سرچینې زیاته کړې، استاد بختاني د شاعر مشرق علامه اقبال پر شاعرۍ په پښتو کې یو کتاب هم لیکلی دی.
غړيYou need to subscribe to view the full article. Please login or register a new account.
