کابل (پژواک ١١ ورى ٩٧): په افغانستان کې د «کابل؛ د بابرشاه په واکمنۍ کې د مغولو د پاچاهۍ زانګو» تر عنوان لاندې د هنري اثارو نندارتون پرانیستل شو.
دغه مطلب په هغې خبرپاڼه کې راغلى چې له اجرائيه رياست څخه پژواک خبري اژانس ته را لېږل شوې ده.
سرچينه کاږي، دغه نندارتون د افغانستان لپاره د امریکا د مطالعاتو انستیتوت او کابل ښاروالۍ له لوري په بابر بڼ کې ترتیب شوی و.
سرچينه زياتوي، د دې نندارتون د پرانيستې په مراسمو کې د هېواد اجرائيه رئيس ډاکټر عبدالله عبدالله د افغانستان لپاره د امریکا د مطالعاتو له مرکز، کابل ښاروالۍ، د امریکا او فرانسې له سفارتونو او پروفیسور مایکل بیري څخه مننه وکړه، چې د دې با ارزښته هنري اثارو نندارتون ته یې زمینه برابره کړې ده.
هغه وویل، چې دغه هنري اثار د کابل د سوله ییز ژوند او د متمدنې حوزې روښانه تاریخ بیانوي، چې نوي نسل ته پر ځان د بسیاینې، اعتماد او هیله مندۍ زده کړې ورکوي.
ده زياته کړه، دغه هنري اثار د کابل د زرین ژوند کیسې تازه کوي چې یو مهال د تمدني حوزې با ثباته او پرجماله ښار او د تمدنونو او همکاریو د عطف ټکی و.
د هغه په وينا، اوس هم په افغانستان کې نړیواله همکاري شته، سره له دې چې ستونزې او ناخوالې موجودې دي؛ خو ورسره د راتلونکي لپاره هیله مندي هم ډېره ده.
نوموړي د مایکل بیري له لوري د پخوانیو تاریخي اثارو څېړل او په فلزي تختو کې یې له سره رغول یو اساسي کار وباله او ویې ویل، چې بیري د افغانستان او افغانانو لپاره خورا ارزښتمنې ډالۍ برابرې کړي دي. د هغه دا کار نه هېرېدونکی دی.
اجرائيه رئیس وويل، نننی نندارتون له افغانانو سره مرسته کوي چې د راتلونکي لپاره د ښه ژوند او سوکالۍ ښه پر ځان حاکم و اوسي او د تېرې با ارزښته زمانې اهمیت درک کړي.
هغه دغه راز وویل، اطلاعاتو و فرهنګ وزارت ته یې دنده سپارلې چې په غزني کې د البیروني زیارت ورغوي او د هغه یاد تازه کولو لپاره علمي ناستې وکړي.
په دې ناسته کې د کابل ښاروالۍ سرپرست عبدالله حبیب زي هم وینا وکړه او ویې ویل، چې یو مهال افغانستان د فرهنګي حوزې مرکز و، چې د دې فرهنګي او تاریخي اثارو حفاظت او هویت ساتل یې اساسي دنده ده.
هغه وویل، دمګړۍ د کابل د فزیکي رغولو ترڅنګ دوی هڅه کوي چې کابل له معنوي اړخه هم ورغوي؛ تاریخي او هنري اثار یې ورغوي او هم په راتلونکی کې د دې ډول فرهنګي اثارو نندارتونونه جوړ کړي.
حبیب زي زیاته کړه، چې دمګړۍ د چهلستون قصر چارې پای ته رسېدلي، د عیدګاه، پل خشتي جوماتونو او د دارالامان ماڼۍ چارې دوام لري.
نوموړي وویل، چې دوی د کابل د فرهنګی اثارو مطالعه بشپړه کړې او په دې برخه کې به نور هم اقدامات وکړي.
په یاده ناسته کې امریکايي څېړونکي مایکل بیري، په کابل کې د امریکا او فرانسې سفارتونو استازو او د افغانستان لپاره د امریکا د مطالعاتو د مرکز مشر هم ویناوې وکړې او د تاریخي کابل او هم د یادو تاریخي ـ هنري اثارو په اړه یې خبرې وکړې.
هغوی د هنري اثارو او نندارتونو د جوړولو ملاتړ وکړ او ویې ویل، چې په دې برخه کې هر راز همکارۍ ته چمتو دي.
غړيYou need to subscribe to view the full article. Please login or register a new account.
