جلال اباد- کابل (پژواک، ۶ غويی ۹۷): په کابل، ننګرهار، خوست او يو شمېر نورو ولايتونو کې د خبريالانو ټولنو په کندهار کې د کابل نيوز د خبريال وژل وغندل.
په کندهار کې د کابل نيوز خبريال عبدالمنان ارغند پرون سهار شاوخوا نهه بجې کندهار ښار د نهمې ناحيې اړوند يارانې بازار سيمه کې د نامعلومو وسله والو له لوري ووژل شو.
د ننګرهار ولايت خبريالانو په کندهار کې د کابل نيوز د خبريال عبدالمنان ارغند وژنه وغندله او د خپل امنيت غوښتنه يې هم وکړه.
دوی وويل، خبريالان بې پرې دي او په جګړه کې ښکېل اړخونه نه بايد د خبريالانو ژوند ته ګواښونه جوړ کړي.
د ننګرهار ولايت خبريالانو د غويي په ۶مه د يوې اعتراضيه غونډې پر مهال د نوموړي وژنه وغندله او جګړه کې ښکېلو غاړو باندې يې غږ وکړ چې د خبريالانو ژوند ته پاملرنه وکړي.
دوی دغه راز په ننګرهار کې هم شرايط نا سم وبلل او له چارواکو يې وغوښتل چې دلته دې هم د د خبريالانو ژوند ته پاملرنه وکړي.
په ختيځ کې د امريکا غږ خبريال او د خبريالانو خونديتوب کمېټې استازي ذبيح الله غازي وويل چې د ارغند وژنه د ټولو خبريالانو پر وړاندې د ګواښ د موجوديت ثبوت دی او څرګندوي، په هېواد کې هېڅ خبریال خوندي نه دی.
هغه په جګړه کې ښکېلو غاړو باندې غږ وکړ، که د هر خبريال راپور مشکل لري، ورسره دې شريک کړي؛ هغه ته دې د وژلو جزا نه ورکوي.
په ننګرهار کې د يک ټلوېزيون خبريال تقي الله تقي په جګړه کې له ټولو ښکېلو غاړو وغوښتل چې خبريالانو ته دې د ستونزو جوړولو پر ځای هغوی ته د راپور ورکولو په برخه کې اسانتياوې برابرې کړي.
دی وويل، خبريالان د ولس ژبه ده او د هغوی په وژلو د ولس په ستوني پښه اېښودل کېږي او د ولس غږ بندېږي.
د طلوع نيوز خبريال زيار خان ياد بيا په ننګرهار کې هم د خبريالانو ژوند په خطر کې ياد کړ او پر چارواکو يې غږ وکړ چې د دوی ژوند خونديتوب ته دې کار وکړي.
هغه وويل زياته کړه ، د ننګرهار امنيتي وضعيت ورځ تر بلې په خرابېدو دی، خبريالان تر جدي ګواښونو لاندې دي او امنيتي ارګانونه يې بايد د ستونزو حل لپاره ګامونه پورته کړي.
د ننګرهار د والي وياند عطاالله خوږياڼي بيا پژواک ته وويل چې دوی د خبريالانو د ژوند خونديتوب لپاره ځانګړي امنيتي پلانونه جوړ کړي او هېڅ داسې ستونزه به نه پېښږي چې د خبريالانو ژوند وګواښي.
د يو بل خبر له مخې، په خوست ولايت کې هم د ملي ، نړیوالو، ځايي رسنیو خبریالانو او مسوولینو د ارغند وژل په کلکه غندلي دي.
دوى له حکومتي مسوولینو وغوښتل چې د خبریالانو د ځاني خوندیتوب په برخه کې د عمل تر بریده کار وکړي او پر نورو ښکیلو ډلو یې هم غږ وکړ چې خبریالانو ته د ښې کاري ساحې په برابرولو او د دوي ځاني خونديتوب په برخه کې خپله همکاري درېغ نه کړي.
بلخوا د لوی کندهار د ځوانانو سراسري شورا په يوه اعلاميه کې د ارغند وژل غندلي او يو نه جبرانېدونکې ضايعه يې بللې ده.
د لوی کندهار د ځوانانو سراسري شورا د ځوانو فعالينو د فکر او عمل پر ازادۍ ټينګار کوي او د شهید ارغند په شان د ځوانو فعالينو وژنه په کلکو ټکو غندي.
د لوی کندهار د ځوانانو سراسري شورا همدارنګه له حکومته غواړي چې د دې پېښې عاملین ولس ته په ګوته او د قانون په چوکاټ کي یې محاکمه کړي.
په کابل کې د خبريالانو کور له خوا په يوه خپره شوې خبرپاڼه کې د ارغند وژل کېدل په کلکه غندل شوي او له حکومته يې غوښتي چې د خبريالانو امنيت ته پاملرنه وکړي.
د رسنيو د ملاتړ ادارې (نى) هم د کابل نيوز د خبریال وژل غندلي او حکومت يې ملامت کړى چې د خبريالانو د امنيت په ټينګولو کې پاتې راغلى دى.
دغه راز د کندوز، بغلان ، بلخ او يو شمېر نورو ولايتونو خبریالانو هم ياده پېښه غندلې ده.
غړيYou need to subscribe to view the full article. Please login or register a new account.
