کندهار (پژواک، ۲۰ لېندۍ ۹۷): د اطلاعاتو او فرهنګ وزارت چارواکي وايي، په کندهار کې د خرقې مطهرې او احمد شاه بابا مزار ځیني توکي متولیانو تر خپل منځ سره وېشلي او کورونو ته یې وړي دي.
د یاد وزارت مرستیال پوهنوال رسول باوري دغه څرګندونې په کابل کې د ځوانانو پارلمان کې کړې او د دې موضوع د څېړلو غوښتنه یې کړې ده.
نوموړي ویلي وو، په دغو توکو کې غالۍ او نور شامل دي چې د دغه ځای متولیان شخصي ګټه ورڅخه اخلي.
د کندهار د اطلاعاتو او فرهنګ رییس فضل الباري بریالی هم وايي چې د خرقې شریفې متولیانو د دغه تاریخي ځای او زیارت اړوند غالۍ، قندیلونه او ځيني نور توکي په خپلو منځونو کې وېشلي او کورونو ته یې وړي دي.
نوموړي د لېندۍ په ٢٠مه پژواک خبري اژانس ته وویل، په ټولیزه توګه کوم توکي چې د دغسې تاریخي اماکنو لپاره راوړل کېږي، د همدې ځای ملکیت دی او متولیان حق نه لري چې خپلو کورونو ته یې یوسي.
دی زیاتوي، اړوند وزارت امنیتي ارګانونو ته دنده سپارلې چې د دې په موضوع په اړه څېړنه وکړي.
د ده په خبره، د اطلاعاتو او فرهنګ وزارت د مرستیال رسول باوري تر څرګندونو وروسته ولایت مقام هم د دې موضوع د څېړلو لپاره یو پلاوی ټاکلی دی.
خو د خرقې مطهرې متولیان دغه ادعا ردوي او وايي، د دغه زیارت ټول توکي خوندي دي.
محمد نسیم اخندزاده چې د خرقې مطهرې د متولیانو له ډلې دی پژواک اژانس ته وویل، ځیني له کاره لوېدلي توکي یې له زیارته لرې کړي او خوندي کړي دي.
هغه دغه څرګندونې ناسمې وګڼلې چې ګواکې د دغه مذهبي او تاریخي ځای ځیني توکي دې دوی په خپلو منځونو کې وېشلي او کورونو ته وړي وي.
د کندهار فرهنګیان او لیکوالان له تاریخي اثارو او ابداتو سره دغسې چلند د اندېښنې وړ بولي او ساتنه یې د دولت مکلفیت بولي.
د کندهار پوهنتون مرستیال، لیکوال او څېړونکی انجنیر شېرشاه رشاد وايي، د تاریخي اثارو او ابداتو ساتنه نه یوازې د دولت دنده ده، بلکې خلک یې هم باید په ساتنه کې برخه واخلي.
دی وايي، دغسې ځایونه د ټول ملت شتمني وي او هیڅوک هم ورڅخه د خپل شخصي ملکیت په توګه استفاده نه شي کولای.
د کندهار امنیتي چارواکي وايي، په دې اړه د وزارت امر ته انتظار باسي چې له ترلاسه کېدو سره به یې په دې اړه څېړنه کوي.
خرقه مطهره د هېواد له مهمو تاریخي او مذهبي ځایونو شمېرل کېږي چې د اسلام د پیغمبر حضرت محمد ص چپنه په کې ساتل کېږي او هره ورځ سلګونه کسان دغه زیارت ته ورځي.
د دغه زیارت ساتنه په کندهار کې د یوې کورنۍ له خوا کېږي چې ادعا کوي په تاریخي توګه د دغه ځای د ساتنې چارې دوی ته سپارل شوي او همدوی یې متولیان دي.
غړيYou need to subscribe to view the full article. Please login or register a new account.
