پلخمري(پژواک، ٢٠ کب ٩٧): د بغلان د نهرین ولسوالۍ ښوونکي د میاشتنۍ تنخوا له ځنډه شکایت کوي او ادعا يې وکړه چې اړوندو مامورینو یې له معاشونو د ارزیابۍ په نوم پيسې هم ګرځولې دي.
د نهرین ولسوالۍ لسګونو ښوونکو د کب په ۲۰ مه د بغلان د پوهنې ریاست مخ ته په یوه اعتراضیه غونډه کې رسنیو ته وویل چې له دې غونډې يې موخه د نهرین ولسوالۍ له معتمد او د پوهنې مدیر څخه شکایت دی.
دوى وايي چې د ولسوالۍ د پوهنې مديريت له ۷۵۰ ښوونکو څخه د ارزیابۍ په نوم زرګونه افغانۍ ګرځولي چې باید پوښتنه ترې وشي.
د دغو ښوونکو له ډلې څخه عظیم محمد پریاني پژواک ته وویل چې د پوهنې مدیر او معتمد له سلګونو ښوونکو د ارزیابۍ په نوم ۷۵۰زره افغانۍ پټې پیسې اخیستې دي.
پریاني زیاتوي چې د نهرین ولسوالۍ معتمد ښوونکو ته میاشتني معاشونه هم په قسطونو ورکوي چې د ځینو ښوونکو د تېرو څو میاشتو معاشونه پاتې دي.
دغه راز د محمد ملنګ په نوم بل ښوونکی هم ادعا لري چې د روان کال د وري میاشتې معاش یې لاهم نه دی ترلاسه کړی.
هغه زياتوي: ((په علت یې نه يم خبر خو د تېر حمل میاشتې له معاش څخه مې څلور نیم زره افغانۍ ګرځول شوي اوس راته وايي چې د ارزیابۍ په نوم یې ګرځولي.))
يو شمېر نورو اعتراض کوونکو هم ورته څرګندونې وکړې.
د اړوندې موضوع په اړه د بغلان د پوهنې ریيس سید اسماعیل مجاهد له ښوونکو د اخیستل شوو پیسو او معاشونو د ځنډولو په اړه بې خبري وښوده او ويې وويل چې د يادې موضوع د څېړنې په موخه يې کمېټه ټاکلې ده.
ریيس زیاتوي، هېڅوک حق نه لري چې له ښوونکي د ارزیابۍ په نوم پيسې واخلي او نه هم څوک حق لري چې د ښوونکو معاشونه په خپل جیب کې وساتي.
هغه ګواښ وکړ چې که په دغه برخه کې اسناد په لاس ورغلل نو عاملین به یې د قانون منګولو ته وسپاري.
بلخوا د نهرین ولسوالۍ معتمد عمرا خان ځدراڼ بیا پرې لګول شوي تورونه ردوي او وايي چې نن لسګونو ښوونکو د شخصي عقدې پر اساس له ده څخه شکایت کړی دى.
هغه وايي:((پاتې سلګونه نور استادان زما له کاره رضایت لري او سبا ممکن زما د ملاتړ په موخه غونډه وکړي.))
ځدراڼ زیاتوي، د ښوونکو په نوم ترلاسه کړي ټول معاشونه یې ښوونکو ته سپارلي او د ارزیابۍ کارونه یې تر لاس لاندې دي، تر اوسه خلاص شوي نه دي چې له ښوونکو سره کومه معامله په کې وکړي.
د يادونې ده چې تېر کال د ملي امنیت موظفينو د بغلان د معارف ښاري امر، نظارت کوونکی او معتمد هم د اداري فساد په تور نیولي وو.
غړيYou need to subscribe to view the full article. Please login or register a new account.










