مزارشريف (پژواک، ۱۷ ورى ۹۸): د بلخ امنيه قوماندان وايي، د مزارشریف ښار په هر کور او هره قرارګاه کې چې نامسوول وسله وال شتون ولري، پوليس یې په تعقیب کې دي او له نيولو وروسته به يې د قانون منګولو ته سپاري.
امنیه قوماندان مل پاسوال عبدالرقيب مبارز دغه څرګندونې د وري په ۱۷مه په مزارشريف کې ډاياګ (د بې وسلې کولو پروګرام) ته د يو شمېر وسلو سپارلو پر مهال وکړې.
ده زياته کړه، تېره ورځ يې په مزارشريف کې د ناقانونه وسله والو د نيولو او بې وسلې کولو پر ضد کمپاين پيل کړ چې په لومړۍ ورځ يې ۳۴ نامسوول وسله وال، وسلې او بې اسناده موټر نيولي چې قضیه یې تر څېړنې لاندې ده.
د هغه په وينا، پوليس هڅه کوي مزارشریف ښار له ناقانونه وسله والو څخه پاک کړي.
امنيه قوماندان وويل: ((موږ به هغو کورونو او قرارګاوو ته ورځو چې هلته ناقانونه وسله وال موجود وي، تاسې به شاهدان ياست چې موږ به هغوی نيسو او د قانون منګولو ته به يې سپارو.))
مبارز زياتوي، پر دې سربېره چې پوليس د خلکو د مالي او ځاني امنيت خونديتوب دنده لري، په هېڅ ډول به هغو خلکو ته د فعاليت اجازه ورنه کړي چې د قانون خلاف کړنې ترسره کوي.
د بلخ امنيه قوماندان دا هم وويل چې د پوليسو له خوا نيول شوي وسله وال او وسلې يې د يوه موظف ټيم له خوا څېړل کېږي او په وينا يې، کوم کس چې رسمي جواز ولري، هغو ته بېرته وسله ورکول کېږي.
مبارز وايي، په دې برخه کې هېڅ ډول واسطه ورته د منلو نه ده او په وينا يې، پوليس به خپله دنده له قانون سره سم پر مخ بيايي.
امنيه قوماندان وويل، هر هغه څوک چې له ناقانونه وسله والو سره مرسته کوي او هغوی ته د فعاليت زمينه برابروي، د جرم شريکان دي او پر ضد به يې مبارزه وشي.
هغه زياته کړه، هڅې يې روانې کړې څو د بلخ په هغو ولسواليو کې هم امنيت ټينګ کړي چې دمګړۍ ستونزې په کې دي.
د نوموړي په خبره، لا هم يو شمېر پوليس د ناقانونه اشخاصو او وسله والو په خدمت کې دي او دوی هڅه پيل کړې څو د بلخ پوليسو ليکې منسجمې او منظمې کړي.
مبارز په نږدې وخت کې، په بلخ کې له امنيتي ګواښونو سره د مبارزې په منظور د شپنيو عملياتو پيلېدو خبر هم ورکړ.
د بلخ امنيه قوماندان د خپلو خبرو په پای کې ۲۳ بېلابېل ډول وسله د ډاياګ يا بې وسلې کولو پروګرام ته وسپارله.
په ورته وخت کې په شمال زون کې د ډاياګ مسوول جنرال عبدالمنان عابد وايي، نامسوول وسله وال د ښارونو د امنيت لپاره تر طالب او داعش هم خطرناک دي.
هغه غوښتنه وکړه چې پوليس بايد هغه وسلې هم ډاياګ ته وسپاري چې پر رسمي جواز درلودو سربېره د اشخاصو له خوا په ښارونو او عامه ځايونو کې ګرځول کېږي.
نوموړي د پوليسو پر دغه کار هم نیوکه وکړه چې يو ځل وسله نيسي او بيا یې له څېړنې وروسته بېرته ور سپاري چې دا چاره غير قانوني ده.
نوموړي په شمال زون کې د نامسوولو وسله والو پر شتون او زياتوالي اندېښنه وښوده او له امنيتي ځواکونو يې په دې برخه کې د جدي اقداماتو غوښتنه وکړه.
بل لور ته د افغانستان د کورنيو چارو وزارت هم په يوه اعلاميه کې ويلي چې تېره ورځ يې په مزارشريف ښار کې د ځانګړو پوليسو د عملياتو پر مهال ۳۴ نامسوول وسله وال، وسلې او څو بې اسناده موټر نيولي دي.
غړيYou need to subscribe to view the full article. Please login or register a new account.
