طالبانو د مزارشريف هوايي ډګر د استخباراتو مدير وژلی

مزارشريف (پژواک، ۲۵حمل، ۹۸): د بلخ ولايت د مزارشريف د هوايي ډګر د استخباراتو مدير د طالبانو په بريد کې وژل شوی دی.

د دغه ولايت د امنيې قوماندانۍ وياند عادل شاه عادل د وري په ۲۵مه پژواک خبري اژانس ته وويل چې د مزارشريف هوايي ډګر د استخباراتو مدير احمد خالد پرون ناوخته د وسله والو طالبانو په بريد کې وژل شوی دی.

عادل زياته کړه چې احمد خالد له خپلې کورنۍ سره يو ځای له مزارشریف څخه د کابل پر لاره و چې د سمنګان- بغلان پر لويه لار په چشمه شېر سيمه کې د طالبانو له کمين سره مخ شو.

د نوموړي په وينا، لومړی طالبانو موټر ته د درېدو اشاره کړې وه، خو احمد خالد موټر نه دی درولی چې د شا له لوري یې پرې ډزې کړې او د سر په برخه کې لګېدلی او وژل شوی دی.

د امنيې قوماندانۍ وياند وايي چې په ياد برید کې د احمد خالد د کورنۍ نورو غړو ته زیان نه دی اوښتی.

په دې وروستیو کې د جګړو او وسله والو فعالیتونو له امله د شمال- کابل لویه لار د بغلان ولایت په مربوطاتو کې نا امنه شوې چې له امله یې مسافرین له جدي اندېښنو سره مخ دي.

طالبانو هم ويلي چې د بغلان د چشمه شېر په سيمه کې يې پر يو دولتي موټر ډزې کړې او په کې سپاره کسان يې وژلي دي.

غړي

You need to subscribe to view the full article. Please login or register a new account.