کابل (پژواک ٦ چنګاښ ٩٨): ولسمشر غني او د پاکستان لومړي وزير ټينګار کړى چې له تېرو تېروتنو څخه په زده کړه باید تېروتنې بیا تکرار نه شي او د دواړو هېوادونو ترمنځ د ښو اړیکو، مناسباتو، همکاریو او راتلونکي لپاره دې ګډ کار وشي.
دغه مطلب په هغې خبرپاڼه کې راغلى چې له ارګ څخه پژواک خبري اژانس ته رالېږل شوې ده.
ولسمشر محمد اشرف غني د يوه لوړ پوړي پلاوي په مشرۍ نن سهار په دوه ورځني رسمي سفر د پاکستان پلازمېنې اسلام اباد ته لاړ.
په ياده شوې خبرپاڼه کې راغلي چې ولسمشر غني ته نن له غرمې مخکې پلازمېنه اسلام اباد د صدارت مقر کې د پاکستان لومړي وزیر عمران خان تود هرکلی ووایه او له ولسمشر څخه یې پاکستان ته د رسمي سفر له امله مننه وکړه.
سرچينه زياتوي، د دواړو هېوادونو د ملي سرودونو له غږولو او د جمهور رئیس غني له لوري د تشریفاتو قطعې له معاینې وروسته دواړو مشرانو یو بل ته د دواړو هېوادونو لوړپوړي دولتي پلاوي ور وپېژندل.
سرچينه کاږي، په دغه کتنه کې جمهور رئیس غني او د پاکستان لومړي وزیر د دوه اړخیزو اړیکو او همکاریو په اړه بحث او خبرې وکړې.
د پاکستان لومړي وزیر له جمهور رئیس غني څخه پاکستان ته د رسمي سفر له امله مننه وکړه او دا یې د دواړو هېوادونو د اړیکو، همکاریو او اعتماد فضا د رامنځته کولو لپاره مهم ګام وباله.
نوموړي هیله وښوده چې دا سفر به د نورو سفرونو په پرتله له لاسته راوړنو ډک وي.
همدارنګه دواړو مشرانو د افغانستان او پاکستان تر منځ د ټرانزیټ، سوداګرۍ او پانګونې په اړه ټینګار وکړاو پرېکړه وشوه چې د دواړو هېوادونو ګډه کاري کمېټه به په دې برخو کې د عملي او چټکو ګامونو لپاره زمینه برابره کړي.
ولسمشر غني د پاکستان لومړي وزیر او خلکو څخه د تود هرکلي او مېلمه پالنې له امله مننه وکړه او ويې ویل، د سولې مشورتي لویې جرګې د استازو د هغه وړاندیز او اجماع په اساس چې موخه یې د افغانستان او پاکستان تر منځ د ښو اړیکو ایجاد دی، پاکستان ته راغلی دى.
ده هیله څرګنده کړه، دغه سفر او له پاکستاني مقاماتو سره کتنې او بحثونه به د افغانستان او پاکستان د دولتونو او ملتونو ترمنځ د اړیکو او همکاریو او د دولت په دولت اړیکو د ایجاد پیلامه وي.
غني وويل، د افغانستان او پاکستان او د سیمې د هېوادونو د پرمختګ او همکاریو لپاره زیاتې زمینې او فرصتونه برابر شوي او افغانستان په دې برخه کې عملي ګامونه اخیستي دي.
هغه زياته کړه، د سیمه ییزه همکاریو او اتصال د فکر او لیدلوري او په دې برخه کې د افغانستان د موقعیت او هلو ځلو له امله منځنۍ اسیا او جنوبي اسیا د سوداګرۍ، ټرانزیټ او راکړو ورکړو له پلوه یو له بل سره د نښلېدو په حال کې دي.
اشرف غني ويلي، د افغانستان او پاکستان ګډه کاري کمېټه به د سیمه ییزه همکاریو او اتصال په برخه کې د پاکستان فعال رول او ګډون هم وهڅوي.
د ده په خبره، دا به د دواړو هېوادونو او د سیمې د نورو هېوادونو د اقتصادي ودې او د خلکو د ژوند د هوساینې په برخه کې ښې پایلې ولري.
غړيYou need to subscribe to view the full article. Please login or register a new account.
