ترينکوټ (پژواک، ۸ چنګاښ ۹۸): د اروزګان د کرنې او مالدارۍ رياست مسوولين وايي چې سږ کال دغه ولايت د غلې له اړخه پر ځان بسيا شوی او له نورو ولايتونو ورته د غنمو ور وړلو اړتيا نشته.
د دوى په وينا، وروستي ورښتونه، د کوکنارو نه کرل او پر للمي ځمکو د غنمو کرل، هغه څه دي چې د اروزګان کروندګر او عام خلک يې خوشحاله کړي او ورسره سم په دغه ولایت کې د غنمو بيې هم ټيټې شوې دي.
يوه مياشت مخکې په دغه ولايت کې د يو من غنمو (۴،۵ کيلوګرام) بيه له ۲۲۰ نه تر ۲۵۰ کالدارې پورې وه، خو د غنمو له حاصل ټولو وروسته په مرکز ترینکوټ کې د يو من غنمو بیه ۱۵۰ کلدارې او د دغه ولایت په يو شمېر ولسوالیو کې بيا ۹۰ کلدارې ده.
د اروزګان کروندګر او ځمکوال وایي، سږ کال نه یوازي د غنمو بیې د پام وړ ټیټې شوې، بلکې د کال تر پایه ترلاسه شوي حاصلات د اروزګان د خلکو لپاره بسنه هم کوي.
د اروزګان د مرکز ترينکوټ ښار د غلامان سيمې يوه کروندګر چې د غنمو ميده کولو ماشين (تريشل) باندې بوخت و، پژواک ته وویل: ((ډېر خوښ يم، حاصلات مو زيات شوي او زموږ اړتياوې پوره کولى شي.))
د شمس الله په نوم دغه کروندګر زياته کړه، پر خپلو ځمکو يې سږ کال هم غنم کړلي وو خو له دې مخکې يې کوکنار کرل.
د نوموړي په وينا، په تېر ژمي کې د ورښتونو تر څنګ د ناروغیو نشتوالی د دې لامل شو چې سږ کال يې حاصلات ښه او د پام وړ زیات شي.
د چرمګر سیمې يوه کروندګر حاجي فضل الرحیم پژواک ته وویل، د غنمو حاصلاتو په زياتېدو سره په مرکز او ولسوالیو کې د غنمو بیې ټیټې شوې دي چې ځايي خلک پرې خوښي ښيي.
هغه وايي، په دغه ولایت کې سږ کال نه یوازې پر کرنیزو ځمکو غنم کرل شوي وو او د تریاکو ځای یې نیول و، بلکې پر زرګونه جریبه شاړو ځمکو هم للمي غنم کرل شوي وو او ښه حاصل يې ورکړى دى.
د نوموړي په وينا، اوس په ترينکوټ کې د غنمو بيې يو نيم او په ولسواليو کې دوه برابره ټيټې شوې دي.
بلخوا د ترينکوټ ښار ځيني اوسېدونکي وايي چې د غنمو حاصلاتو په زياتېدو سره پاکستاني سوداګر راغلي او غواړي چې دغه غنم وپېري.
د ترينکوټ يوه اوسېدونکي شريف الله پژواک ته وويل، که اړوند ادارې په ښار کې د غنمو د لېږد مخنيوی او په ځانګړې توګه د پاکستاني سوداګرو له خوا د غنمو پېرلو مخه ونه نیسي، نو ډېر ژر به د غنمو بيې بېرته لوړې شي او هر څوک به یې د پېرلو توان له لاسه ورکړي.
د اروزګان د کرنې، اوبو لګولو او مالدارۍ ریاست مسوولین هم مني چې سږ کال په دغه ولایت کې د غنمو حاصلات ۲۴ سلنه زیات شوي چې ورسره بیې هم ټيټې شوې دي.
سرپرست رييس انجنير سمیع الله پژواک ته وویل، په ژمي کې زيات ورښتونه، د اصلاح شوو تخمونو وېش او د کوکنارو له کرلو د کروند ګرو لاس پر سر کېدل د غنمو د کښت زیاتوالي لامل شوى دى.
هغه زياتوي، سږ کال په سلګونه جریبه دښتي ځمکو کې للمي غنم هم کرل شوي وو چې کروندګرو يې حاصلات ترلاسه کړي دي.
د نوموړي په وينا، د غنمو تر څنګ د نورو خوراکي توکو او سبو بيې هم ټيټې شوې دي.
د ترينکوټ ښاروال نعمت الله بختيار پژواک ته وويل چې د غنمو اوسنۍ بيې د تېرو کلونو په پرتله د پام وړ ټيټې شوې دي.
بختیار ترینکوټ ښار ته د غنمو پېرلو لپاره د پاکستاني سوداګرو د راتګ په اړه ناخبري ښيې خو وايې، که چېرې داسې موضوع وي نو دوی به د نورو ادارو په همکارۍ دې ستونزې ته حل لاره پیدا کړي.
غړيYou need to subscribe to view the full article. Please login or register a new account.










