د حج الوتنې راتلونکې اوونۍ پيلېږي

کابل (پژواک، ١٣ چنګاښ ٩٨): د افغانستان د حج ارشاد او اوقافو وزارت وايي چې سعودي عربستان ته د حج الوتنې راتلونکې اوونۍ پيلېږي.

د دغه وزارت وياند وياند ناصرالدين دريځ د چنګاښ په ١٣مه پژواک خبري اژانس ته وويل چې دا الوتنې د اريانا او کام ايیر شرکتونو له خوا ترسره کېږي.

هغه زياته کړه چې د حج الوتنې د راتلونکې اوونۍ په اوږدو کې  د چنګاښ له ١٥ تر ٢٠مې پورې به پيل شي.

د دغه وزارت د معلوماتو له مخې، ټاکل شوې ده چې سږ کال له افغانستانه شاوخوا ٣٠زره کسان د حج فريضې ادا کولو په موخه سعودي عربستان ته ولاړ شي.

بلخوا د هېواد د ملکي هوايي چلند ادارې د حج وزارت، هوايي شرکتونو او ماليې وزارت او د کابل هوايي ډګر له امنيتي مسوولينو سره د حج الوتنو په اړه ځانګړې ناسته کړې ده.

د دې ادارې له خوا په يوه خپره شوې خبرپاڼه کې راغلي چې په دې ناسته کې د حج د عملياتي چارو په اړه د همغږۍ رامنځته کولو او نورو موضوعاتو باندې خبرې وشوې.

په خبرپاڼه کې راغلي چې سږ کال د حاجيانو د لېږلو پروسه د کام ايير او اريانا هوايي شرکتونو باندې وېشل شوي، د کابل له هوايي ډګره حاجيان د اريانا او د کندهار، هرات او مزارشريف له هوايي ډګرونو د کام ايير شرکت له خوا ترسره کېږي.

سرچينې ويلي چې د کام ايير هوايي شرکت له سعودي عربستانه د الوتنو اجازه اخيستې خو د اريانا شرکت تر اوسه دا اجازه نه ده اخيستې.

د ملکي هوايي چلند ملي ادارې له اريانا هوايي شرکت څخه جدي وغوښتل چې ژر تر ژره له سعودي څخه د اجازې اخيستلو کارونه خلاص کړي او الوتنو ته ځان اماده کړي.

د اريانا هوايي شرکت استازو د غونـډې ګډونوالو ته ډاډ ورکړى چې د حاجيانو لپاره يې ځانګړې شوې چارټر الوتکې يې برابرې کړې او الوتنو ته بشپړه اماده ګي لري.

غړي

You need to subscribe to view the full article. Please login or register a new account.