فېروزکوه (پژواک، ٢ زمری ٩٨): د غور ولایت چارواکي وايي چې د روان کال په لومړیو څلورو میاشتو کې د ښځو د وژنو او ځان وژنو پېښې د تېر کال د همدې مودې په پرتله څلور برابره ډېرې شوې او د ښځو د وژنو اتیا سلنه عاملین تښتېدلي دي.
د غور د بشري حقونو کمېسیون سرپرست عبدالصمد امیري پژواک خبري اژانس ته وویل، په دغه کمېسیون کې د روان کال په لومړیو څلورو میاشتو کې له ښځو سره د تاوتریخوالي ۳۲ قضیې ثبت شوې چې اووه د وژنو او پنځه د ځان وژنې قضیې هم په کې شاملې دي.
هغه زیاته کړه، د تېر (۱۳۹۷) کال په لومړیو څلورو میاشتو کې دغه کمېسیون د تاوتریخوالي ۱۳ موارد ثبت کړي وو چې دوه د وژنو او یو د ځان وژنې مورد هم په کې شامل وو.
د سرچینې د معلوماتو له مخې، له ښځو سره د تاوتریخوالي له ټولو ۵۱ قضیو چې تېر کال ثبت شوې، اووه د ځان وژنې او شپږ د ښځو د وژنې موارد شامل دي.
د ده په خبره، کورنی تاوتریخوالی، د قانون له حاکمیت، د قومي مخورو نفوذ، ناسم رسم او رواجونه، بېسوادي، بېوزلي او د قانون او اسلام څخه ناخبري د ښځو د وژنو ستر لاملونه دي.
نوموړي یادې شمېرې د اندېښنې وړ وبللې او ویې ویل، ښايي د سږ کال تر پایه دغه شمېر لوړ شي.
د دغه ولایت د لعل و سرجنګل ولسوالۍ مدني فعالې شریفې موحد پژواک خبري اژانس ته وویل، په دې ولسوالۍ کې د ښځو پر وړاندې تاوتریخوالی د پام وړ ډېر شوی دی.
د نوموړې په خبره، یوازې د روان کال له پیل راهیسې په دې ولسوالۍ کې د ځان وژنې شپږ پېښې رامنځته شوې دي.
هغه وویل، دغه قضیې د حکومتي بنسټونو له خوا سمې نه څېړل کېږي او ډېرې دا ډول قضیې د جرګو او قومي شوراګانو له خوا حل کېږي.
دغه راز د ولایتي شورا غړې ګلثوم رضایي په یاد ولایت کې د تاوتریخوالي، په ځانګړې توګه د ښځو د وژنو او ځان وژنو د پېښو له زیاتېدو اندېښنه څرګندوي.
هغه زیاته کړه، د یادو پېښو ډېروالی بېلابېل لاملونه لري، خو ازادي او ډیموکراسي یو ستر لامل کېدای شي؛ ځکه یو شمېر نجونې د کورنۍ له خوا تر ډېر کم غم وروسته ځان وژنه کوي.
نوموړې د نمونې په توګه وویل، د ځان وژنې یوه قضیه چې په دې وروستیو کې په لعل او سرجنګل ولسوالۍ کې رامنځته شوې ده، لامل یې د لور او خور ترمنځ خبرې وې چې په پایله کې یې نجلۍ ځان سیند ته غورځولی و او ډوبه شوې ده.
دې سیمه ییزې چارواکې اندېښنه څرګنده کړه چې د تاوتریخوالي په ځانګړې توګه د ښځو د وژنې د قضیو عاملین نه نیول کېږي او ډېری دغه ډول قضیې د قومي جرګو له لارې حل کېږي.
د غور د ښځو د حقونو د ریاست مديرې زرمینې کشتیار پژواک ته وویل، د روان کال له پیله راهیسې ۴۸ قضیې چې شپږ موارد یې د وژنو او ځان وژنو پېښې دي، په یاد ریاست کې ثبت شوې چې د تېر کال د لومړیو څلورو میاشتو په پرتله ډېروالی ښيي.
د دې په خبره، د تېر کال په لومړیو څلورو میاشتو کې د تاوتریخوالي ۳۱ قضیې ثبت شوې وې.
هغې زیاته کړه: ((سږ کال له ښځو سره تاوتریخوالی ډېر شوی او ستر لامل یې دا دی چې د تاوتریخوالي د قضیو ۲۰ سلنه عاملین نیول کېږي او پاتې نور تښتي.))
کشتیار وویل، د ښځو چارو ریاست تل هڅه کړې چې د تاوتریخوالي، په ځانګړې توګه د ښځو د وژنو عاملین ونیول شي او له همدې امله څو ځلې له پولیسو غوښتنه شوې چې په دې برخه کې مرسته وکړي.
دغه راز نوموړې زیاته کړه، د ښځو پر وړاندې د تاوتریخوالي د کمېدو او ښځو د حقونو لپاره یې د عامه پوهاوي پروګرامونه جوړ شوي او په پام کې لري چې دغه پروګرامونه پراخ کړي.
غړيYou need to subscribe to view the full article. Please login or register a new account.










