منځپانګې ته تلل
شنبه ۲۱ نومبر ۲۰۲۶ · کابل ۸:۳۴ غ.و
۷°نیمه ورېځ · ↑۱۴° ↓۲°د هوا کیفیت: منځنی
غړي

«جعلکاران غواړي په شبرغان ښار کې ۱۰زره جريبه ځمکه غصب کړي»

· ۷ دقیقې لوستل · ۹۲ کتنې

شبرغان (پژواک، ٩ زمری ٩٨): د شبرغان ښاروال وايي چې یو شمېر جعلکاران د پخواني ولسمشر حامد کرزي په جعلي لاسلیک غواړي چې په دغه ښار کې ۱۰ زره جريبه ځمکه غصب کړي او پر بېځایه شوو کډوالو یې وپلوري.

 د شبرغان ښاروال انجنیر محمد حسین صالح پژواک خبري اژانس ته وویل: ((د هغو اسنادو او پاڼو له مخې چې زموږ له دفتر سره شریک شوي، یو شمېر کسان غواړي چې د حاتم طايي د بښنو په څېر بېځایه شوو کسانو ته په غیر قانوني ډول ځمکه ووېشي.))

 هغه زیاته کړه، دوی د پخواني ولسمشر په جعلي لاسلیک امر لري چې ۲۲ زره بېځایه شوو کورنیو ته د شبرغان ښار په سه شنبې سیمه کې ګډوالو او بېځایه شوو کسانو ته ښارګوتی جوړ کړي.

 نوموړي د کوم کس له نوم اخیستو پرته وویل چې دغه کسان له تېرو پنځلسو کلونو راهیسې هڅه کوي چې د پخواني ولسمشر په هغه جعلي امر لس زره جريبه ځمکه غصب کړي چې د ولسمشرۍ ریاست له خوا باطل بلل شوی دی.

 په هغه سند کې چې پژواک خبري اژانس ترلاسه کړی راغلي: مخدوم محمد عطا، مولوي عبیدالله فرقاني، سیف الدین، قاري مبارک شاه او محمد شفېع یوسفي هغه کسان دي چې ځانونه یې د ښارجوړونې وزارت لیک کې د بېځایه شوو کسانو استازي معرفي کړي دي.

 یوې سرچینې په جوزجان ولایت کې پژواک ته وویل، یادو څلورو کسانو په ۱۳۸۳ کال کې په دغه ډول جعلي حکم د لس زره جريبه ځمکې د غصب پرېکړه کړې وه، خو کله چې د دوی حکم د ولسمشرۍ ریاست له خوا جعلي وګڼل شو، یاد کسان د پولیسو تر تعقیب لاندې راغلل چې په پایله کې قاری مبارک شاه پولیسو ونیو او څلور کاله یې بندي کړ او درې نور کسان فراري شول، خو د قاري مبارک شاه تر خوشي کېدو وروسته یې یو ځل بیا د یادې اندازې ځمکې د غصب لپاره د موضوع تعقیب پیل کړ.

 په لیک کې راغلي: ((موږ د جوزجان د ۲۲زره بېځایه شوو او اړمنو کورنیو استازي د ښارګوټي د جوړېدو په اړه د ولسمشرۍ ریاست د ۱۳۸۳/۷/۱۱ نېټې ۴۲۸۱ حکم لرو او د دغه حکم له مخې، د جوزجان ولایت د ځمکو ریاست لس زره کرنیزه او شاړه ځمکه تر سروې، نقشې او بیې ټاکلو وروسته زموږ په واک کې راکړې او موږ یې د ښاروالۍ د نقشې مطابق سړک کشي کړې او د شبرغان ښار په جنوبي اړخ کې مو یې درې کیلومتره سړک کانګرېټ کړی، دوه ښوونځي او یو دارالحفاظ مو جوړ کړي دي.))

دغه راز په دغه مکتوب کې د ښارجوړونې له وزارته غوښتنه شوې چې یادو پنځو کسانو ته د ځمکې د لېږد امر مراعات شي.

خو د شبرغان ښاروالۍ د ودانیزو چارو مدیر سید بهرام پژواک خبري اژانس ته وویل، په دې سیمه کې یو ښوونځی د پوهنې ریاست له خوا جوړ شوی او درې کلیومتره سړک د کلیو د بیارغونې او پراختیا وزارت له خوا قیر شوی دی.

هغه روښانه کړه چې د شبرغان ښاروالي د ترکستان د پروژې په اړه چې یاد کسان ورته اشاره کوي، هېڅ معلومات نه لري او دغه ښارګوټی د ښاروالۍ په پلان کې نشته او بشپړ ناقانونه دی.

بهرام زیاته کړه: ((د حکم کړل شوو ځمکو د ارزونې او تسویې په خاطر له مرکز څخه شبرغان ته پلاوی راغلی او دغه پلاوي له موږ څخه د سه شنبه کلي د ښارګوتي په اړه معلومات غوښتي چې موږ یې د مکتوب په ځواب کې لیکلي چې په دغه کلي کې په یاد نوم هېڅ شهرک نه لرو.))

 نوموړي د خپلو خبرو په دوام وویل: ((په دې برخه کې نه د ښاروالۍ له خوا د پلاوي په توګه هېڅ مامور نه دی ګومارل شوی او نه موږ د ښارګوټي په کار کې لاسوهنه لرو.))

په ملي شورا کې د خلکو استازي هم دغه ډول جعل کارۍ مني.

په ملي شورا کې د جوزجان د خلکو استازي عزیزالله الفتي وویل، په دې قضیه کې پنځه کسان دخیل دي چې یو یې مبارک شاه نومېږي او د جعلکارۍ په تور یې څلور کاله بند تېر کړی دی.

هغه زیاته کړه: ((د مولوي عبیدالله فرقاني په نوم یو بل کس هم د دغه جعلکارانو په ډله کې شامل دی چې د دې پروژې یوه سوې مهره ګڼل کېږي.))

 الفتي وویل، ددغې پروژې تر شا لوی لاسونه موجود دي چې د ولایت مسوولین یې په اړه معلومات لري.

 هغه روښانه کړه چې د یادې ځمکې اسناد جعلي نه وي، ولسمشرۍ ریاست باید ولې یوه عادي کس ته لس زره جرېبه ځمکه وبښي.

 نوموړي زیاته کړه: ((زه خپل اسناد او مدرکونه ولسمشرۍ ریاست ته وړاندې کوم څو ددغه ناوړه استفادې مخه ونیول شي.))

 چارواکي څه وايي؟

 د شبرغان ښاروال انجنیر محمد حسین صالح وویل: ((موږ د اړیکو له مخې دغه موضوع له اړوندو دولتي ارګانونو او ولایت سره شریکه کړې او د یادو جعلکارانو له خوا مو د استوګنې د کورونو د نومرو وېش روښانه کړی چې دوی په تقلبي اسنادو دغه کار ترسره کوي، د خپلې ادارې اړوند موقف مو واضح کړی چې ددغو ځمکو د وېش دغه اقدام ناقانونه دی او مسوول ارګانونه یې دې مخه ونیسي.))

 د جوزجان والي مولوي لطف الله عزیزي دغه راز وویل چې مخکې د ولسمشرۍ ریاست له خوا د یادو کسانو د اسنادو د جعلي توب مکتوب ولایت ترلاسه کړی و. بیا وروسته یادو کسانو د ولسمشرۍ ریاست څخه ولایت ته بل مکتوب راوړ چې په کې ویل شوي وو د دوی اسناد جعلي نه دي.

 هغه زیاته کړه: ((په دې برخه کې له ښارجوړونې وزارت څخه شبرغان ښار ته یو پلاوی راغلی او ددغه ښارګوټي د جوړېدو د کار ارزونه کوي، که په ډاګه شي چې دا کسان په ناقانونه او جعلي توګه د یاد ښارګوټي کارونه ترسره کوي عدلي او قضايي ارګانونو ته به وروپېژندل شي.))

 هغه زیاته کړه: ((په جوزجان ولایت کې یو شمېر کسانو مخکې د دولتي ځمکو ځینې برخې غصب کړې وې چې د بېرته راګرځولو چارې یې روانې دي، او موږ توانېدلي یو چې د عدلي او قضايي ارګانونو په همکارۍ له ۲۰۰ جريبه ډېره ځمکه د غاصبینو له لاسه ازاده او اړوند اسناد مو یې ښاروالۍ ته سپارلي دي.))

 نوموړي په دغه ولایت کې د زورواکو له خوا د غصب شوې ځمکې د اندازې په اړه له شمېرو ورکولو ډډه وکړه.

 بخلوا د جوزجان ولایت د اراضۍ ادارې رییس خیرالله کریمي پژواک خبري اژانس ته وویل، د ولسمشر تازه حکم چې په ۱۳۸۳ کال کې د یادو اسنادو په اړه زموږ ادارې ته لېږل شوی و د بېځایه شوو کسانو استازو ته په پنځو نقطو کې د ځمکو پر وېش ټینګار شوی دی.

 هغه وویل، د ولسمشر په حکم کې د سه شنبه، جګدلیک، قره کینیت، شوراریغ او چغچي کلیو کې د ځمکو د وېش یادونه شوې ده.

 هغه زیاته کړه، همدا اوس یې ددغې ستونزې په اړه په دغه ښارګوټي کې لومړنۍ سروې پیل کړې او د شوراریغ او سه شنبه کلیو ته یې د ارزونې پلاوي لېږلي دي.

 په ورته وخت کې د جوزجان ولایت د کډوالو او بېرته راستنېدونکو چارو رییس عبدالمالک رستمي د یادو کسانو له خوا بېځایه شوو ته د ځمکې د نومرو د وېش په اړه بې خبري وښودله.

 هغه وویل: ((موږ په جوزجان ولایت کې د دولت له خوا د استوګنې دوه منظور شوي ښارګوټي لرو چې یو یې د اقچې ولسوالۍ په درې لاري او دویم یې د شبرغان ښار په لوېدیځه برخه کې موقعیت لري، په سه شنبه او شورارېغ کلیو کې بېځایه کورنیو ته د ښارګوټي د جوړېدو په اړه موږ ته هېڅ معلومات نه دي راکړل شوي او دغه مساله زموږ لپاره هېڅ باور او رسمیت نه لري.))

 د جوزجان د ښارجوړونې ریاست چارواکي په دې اړه خبرو ته حاضر نه شول.

 پژواک خبري اژانس هڅه وکړه چې له یادو پنځو کسانو سره جلا خبرې وکړي خو د محمد شفېع یوسفي په نوم یوازې یو کس مرکې ته تیار شو.

 یوسفي د دوی د اسنادو د جعلي توب په اړه د یوې پوښتنې په ځواب وویل: ((عدلي او قضايي ارګانونه موجود دي او دو ی کولای شي په دې برخه کې څېړنه وکړي او دغه موضوع اصلاً په تاسو پورې اړوند نه ده.))

 هغه بیا هم په تونده لهجه وویل: ((زه خپله ژورنالېست یم، له ژورنالېستیکو اخلاقو او کار سره بلد یم، د موضوع څېړنه اصلاً تاسو پورې هېڅ اړه نه لري. دلته کشفي او امنیتي ارګانونه فعال دي او باید دوی دغه کار وکړي، تاسو کولای شئ یوازې د یوه راپور جوړولو ترکچې دغه کار ترسره کړئ او بس.))

 محمد شفېع یوسفي زیاته کړه، په شبرغان کې یو شمېر زورواکو غوښتل چې دغه ښارګوټی ترلاسه او ګټه ترې پورته کړي.

 نوموړي وویل: ((موږ د دوی پر وړاندې مبارزه وکړه او اجازه مو ورنه کړه چې نیتونه یې عملي کړي.))

غړي

You need to subscribe to view the full article. Please login or register a new account.

اړوند خبرونه

ټول امنیت او جرمونه