پل علم (پژواک، ١٤ لړم ٩٨): د لوګر د اطلاعاتو او فرهنګ رياست مسوولين وايي، په دغه ولايت کې هغه لرغوني ځايونه او مقبرې بيارغول کېږي چې د ويجاړېدو له ګواښ سره مخ دي.
په دې اړه د لوګر د اطلاعاتو او کلتور رييس عبدالرحمن تسل د لړم په ١٤مه پژواک خبري اژانس ته وويل چې دغه ولايت بې شمېره لرغونې سيمې او مقبرې لري، خو د تېرو پرله پسې جګړو، طبيعي پېښو او د غير مسلکي کيندنو له امله ويجاړې شوې دي.
هغه وايي: ((په تېرو څو کلونو کې چا يې د جوړولو لپاره توجه نه ده کړې، خو موږ د يوه منظم پلان له مخې غواړو چې لرغوني ځايونه او مقبرې ورغوو.))
دى زياتوي چې د دغه پلان له مخې دا مهال د مرکز اړوند د ملک سبزعلي مقبرې او په بره کي برک ولسوالۍ کې د عبدالقادر مقبرې د ترميمولو چارې روانې دي.
د هغه په وينا، دغه دواړه مقبرې ٨٥٠ کاله قدامت لري چې پر بيا جوړولو يې پنځه ميليونه افغانۍ لګول کېږي.
د تسل د معلوماتو له مخېؤ په دغه ولايت کې ١٨ داسې لرغوني ځايونه او مقبرې شته چې تاريخي لرغونتوب يې په هېواد کې د اسلامي دورې پيل ته رسېږي.
هغه د يوې پوښتنې په ځواب کې وويل: ((د مس عينک لرغوني ښارګوټي په څېر نور مهم تاريخي ځايونه هم لرو، خو د امنيتي مشکلاتو او قاچاقبرو له وېرې نه شو کولاى چې نومونه يې واخلو.))
دغه راز په دې اړه د لوګر د ولايتي شورا غړي سيد قريب الله سادات پژواک ته وويل چې حکومت په تېرو ١٨ کلونو د لرغونو ځايونو بيارغونې او ساتنې ته اړينه پاملرنه نه ده کړې.
هغه وايي: ((ډېر تاريخي اثار قاچاق شوي دي، تېر کال د خروار ولسوالۍ په کافرکوټ او د بره کي برک ولسوالۍ په سجاوند سيمو کې غير قانوني کيندنې روانې وې، داسې به ډېر نور ځايونه هم وي.))
بل لور ته د لوګر د امنيې قوماندانۍ وياند شاپور احمدزي هم پژواک ته وويل چې د دغه ولايت ډېر لرغوني اثار د طبيعي پېښو له امله ويجاړ شوي دي.
خو دى وايي: ((که چېرې اطلاعات او کلتور وزارت وغواړي، بيارغونه يې وکړي، موږ حاضر يو چې امنيت يې ونيسو.))
د يادونې ده، د لوګر ترڅنګ د هېواد په نورو سيمو کې هم لرغوني اثار په غير قانوني او غير فني ډول کيندل کېږي او بيا نورو هېوادونو ته قاچاق کېږي.
غړيYou need to subscribe to view the full article. Please login or register a new account.
