مزارشريف (پژواک، ۵ لېندۍ ۹۸): د "خط نو څېړنيز بنسټ" موندنې ښيي چې د هېواد په يو شمېر پوهنتونونو، ښوونځيو، مدرسو او جوماتونو کې د افراطيت او قومي تضادونو د ودې او پراختيا لپاره تبليغ کېږي.
د ياد بنسټ مسوولين زياتوي چې له دغه حالته بيا وسله والې ډلې د خپلو موخو ترلاسه کولو لپاره استفاده کوي.
د خط نو څېړنيز او ټولنيز بنسټ مشر عبدالقادر مصباح د لېندۍ په پنځمه په مزارشريف ښار کې د تندلارۍ او زيانونو په اړه يې د جوړ شوي يو ورځني کنفرانس څنډه کې پژواک ته وويل چې ان يو شمېر رسنۍ د افراطيت په ترويج کې لاس لري.
هغه زياته کړه چې د تېر يو کال په موده کې يې د افراطيت د عواملو او له هغه څخه پر راولاړو شوو ستونزو باندې څېړنه کړې او ورته جوته شوې چې يو شمېر کړۍ د تندلارۍ او قومي تضادونو د ودې او پراختيا لپاره عملاً کار کوي.
نوموړی وايي، د هېواد په يو شمېر پوهنتونونو، ښوونځيو، مدرسو او جوماتونو کې د افراطيت او قومي ټکرونو رامنځته کېدو لپاره تبليغات روان دی.
د مصباح په خبره، په تحصيلي او تعليمي مرکزونو کې لوستل کېدونکي متون هم د مذهبي تاوتريخوالي او ټولنيز لرې والي برخه کې منفي اثرات لري.
د خط نو بنسټ مسوول زياتوي چې د هېواد يو شمېر رسنۍ هم د افراطيت په وده کې رول لري.
د هغه په وينا، د دې څېړنې پر مهال يې لوستل کېدونکي متون، د معلم يا مدرس د بيان طرز او د شاګردانو د پوهې کچه تر څار لاندې نيولې او ورته جوته شوې چې دا هره برخه يو لړ بدلونونو ته اړتيا لري.
نوموړی وايي چې همدا راز يې يو شمېر جوماتونه هم د څېړنې پر مهال څارلي او ورته جوته شوې چې ډېری وخت د جوماتونو له منابرو داسې بيانونه کېږي چې د خلکو ترمنځ د مذهبي او قومي ټکرونو د رامنځته کېدو لامل ګرځي.
د مصباح په خبره، د څېړنو پايله يې دا ده چې له موجوده تندلارۍ او قومي ټکرونو وسله والې ډلې خپلو موخو ته د رسېدو لپاره په اسانه کار اخلي.
د دغه کنفرانس ګډونوال او ديني عالم مولوي امرالدين ولي پژواک ته وويل چې افراطيت، ترهګري او د قومي تضادونو رامنځته کول د اسلام له نظره مردود او ناروا دي.
هغه زياته کړه چې يو شمېر ډلې د اسلام له نومه په استفادې خپل شخصي اغراض او موخې تعقيبوي چې په هېڅ صورت يې کړنې له دين سره مطابقت نه لري.
د ده په خبره، د ښه او سالم ژوند رامنځته کېدو په موخه اړتيا ده چې د افراطي فکر د له منځه وړو په برخه کې جدي مبارزه وشي.
نوموړی زياتوي چې له تندلارۍ سره د مبارزې يوه لاره دا ده چې د ديني او ټولنيزو مسايلو په اړه د خلکو پوهاوی زيات کړای شي.
د ټولنيزو چارو شنونکي حيات الله جواد پژواک ته وويل چې په ټولنه کې د تندلارۍ رامنځته کېدو لوی لامل له دين او شريعت څخه د مختلفو قرائتونو له امله رامنځته شوی دی.
هغه زياته کړه: ((کله چې يوه ډله راپورته کېږي او له ځان پرته نور ټول فکرونه، ليدلوري او ارزښتونه نفي کوي؛ نو ښکاره خبره ده چې دغه ګام خپله په ټولنه کې د افراطيت له ودې سره مرسته کوي.))
دى وايي، د تندلارۍ د مخنيوي لپاره اړتيا ده چې د ټولنيز زغم او يو بل منلو لپاره جدي هڅې وشي.
د جواد په خبره، د ديني چارو کارپوهان بايد د دين د متعادل او متوسط تصوير خپرولو په موخه په ټولنه کې د بحثونو او کنفرانسونو جوړولو ته زمينه برابره کړي.
نوموړي وويل چې يو شمېر سياسي ډلې د خپلو شخصي، اقتصادي او سياسي اهدافو د تعقيب لپاره له دين څخه د الې په توګه استفاده کوي چې همدې چارې د تندلارۍ مفکوره هم پراخه کړې ده.
خط نو څېړنيز بنسټ په څېړنه کې له حکومت څخه غوښتل شوي وو چې د افراطيت او قومي تضادونو د محوه کېدو په موخه پر تحصلي او تعليمي مرکزونو خپله څارنه زياته کړي.
غړيYou need to subscribe to view the full article. Please login or register a new account.
