کابل (پژواک، ١٠ کب ٩٨): نن په کابل ښار کې د تېرې شنبې په پرتله د ډالر پر وړاندې د افغانۍ ارزښت په لوړېدو د قزاقي اوړو، پاکستانۍ بورې، غوړیو او سرو زرو بیې ټیټې شوې دي.
په دې اوونۍ کې د افغانۍ پر وړاندې د امریکايي ډالرو بیه ۲.۷ سلنه، د سرو زرو بیه ۷.۳ سلنه او د ځینو خوراکي توکو بیې ۱.۶ سلنه ټيتې شوې دي.
د کابل ښار په شهزاده سرای کې د صداقت صرافۍ مالک حاجي میر حسین صداقت پژواک ته وویل چې نن د یوه امریکايي ډالر بیه ۷۴.۲۰ افغانۍ او زر پاکستانۍ کلدارې ۴۸۱ افغانۍ کېږي.
نوموړي زیاته کړه چې د کب په درېیمه د یوه امریکايي ډالر بیه ۷۶.۹۰ افغانۍ او زر پاکستانۍ کلدارې په ۴۹۳ افغانۍ بدلېدلې.
هغه په ډاګه کړه چې د امریکايي ډالر پر وړاندې د افغانۍ د ارزښت لوړېدو لامل د تاوتریخوالي اوونۍ پيل او د طالبان او امریکا ترمنځ د سولې تړون د لاسلیک نېټې رانږدې کېدل دي.
په قطر کې د طالبان او امریکا ترمنځ د سولې له خبرو وروسته چې څه باندې یو کال یې دوام درلود، د تېرې شبنې په شپه له ۱۲ بجو وروسته په ټول هېواد کې د تاوتریخوالي د کمښت اوونۍ پیل شوه.
ټاکل شوې د روانې اوونۍ په پای کې نن د کب په لسمه طالبان او امریکا د سولې هوکړه لیک لاسلیک او ورپسې د سولې بین الافغاني خبرې پیل کړي او په پایله کې پر اوربند توافق وشي څو په افغانستان کې یوې دایمي سولې ته ورسېږي.
د ډالر پر وړاندې د افغانۍ ارزښت لوړېدو د خوراکي توکو پر بیو هم اغېز کړی دی.
د کابل ښار د مڼدوي عمده پلورونکي محمد صمیم وویل، نن د تېرې شنبې په پرتله د ۴۹ کیلوګرامه پاکستانۍ بورې بیه ۱۹۶۰ څخه ۱۹۵۰، د ۴۹ کیلوګرامه قزاقي اوړو بیه له ۱۵۳۰ څخه ۱۵۰۰ او د ۱۶ لېتره خورشید غوړیو بیه له ۱۲۴۰ څخه ۱۲۰۰ افغانۍ ته ټیټه شوې ده.
خو هغه زیاته کړه چې نن د تېرې شنبې په څېر د ۲۴ کیلوګرامه لومړۍ درجه پاکستانۍ وریجو عمده بیه ۲۰۰۰ افغانۍ، یو کیلو شین اندونیزیايي چای په ۳۰۰ افغانۍ او یو کیلو تور افریقايي چای په ۳۲۰ افغانۍ پلورل کېږي.
په ځینو مواردو کې د یو شمېر توکو پرچون بیه له عمده بیې سره لږ خو په ځینو مواردو کې ډېر توپیر لري.
د کابل ښار د تایمني د ۱۳ سړک د خوراک توکو پلورونکي احمد مصطفی وویل، نن د پرچون توګه د ۴۹ کیلوګرامه قزاقي اوړو بیه ۱۵۸۰ افغانۍ، ۴۹ کیلوګرامه پاکستانۍ بوره په۲۰۰۰ افغانۍ، ۲۴ کیلوګرامه لومړۍ سېله پاکستانۍ وریجې په ۲۳۰۰ افغانۍ، ۱۶ لېتره خورشید غوړي په ۱۳۰۰ افغانۍ، یو کیلو شین اندونیزيايي چای په ۳۲۰ افغانۍ او یو کیلو تور افریقايي چای په ۳۶۰ افغانۍ پلورل کېږي.
د سرو زرو بیې هم ټيټې شوې دي.
د کابل ښار د تيمورشاهي واټ زرګر حاجي فواد احمد صالح زاده وویل چې نن د تېرو اوو ورځو په پرتله د ۷۵۰ عیاره عربي سرو زرو بیه له ۳۳۰۰ څخه ۳۱۰۰ افغانۍ او د یو ګرام ۵۸۵ عیار روسي سرو زرو بیه له ۲۸۰۰ څخه ۲۵۵۰ ته ټيټه شوې ده.
د هغه په خبره، په نړیوالو بازارونو کې د سرو زرو د بیو ټیټېدو ترڅڼګ د ډالر پر وړاندې د افغانۍ د ارزښت لوړېدل هم د سرو زرو پر بیو اغېز کړی دی.
د سون توکو بیې پر خپل حال پاتې دي.
د کابل ښار د وزیر اباد د تېلو ټانک یوه کارکوونکي عبدالهادي وویل، نن د تېرې شنبې په پرتله د یوه لېتر پټرولو بیه ۴۶ افغانۍ او یو لېتر ډېزل هم په ۴۶ افغانۍ پلورل کېږي.
دغه راز د کابل ښار د تایمني د څلورم سړک ګاز پلورونکي احمد جاوېد وویل، نن د تېرې شنبې په څېر یو کیلو مایع ګاز په ۵۵ افغانۍ پلوري.
غړيYou need to subscribe to view the full article. Please login or register a new account.
