کابل (پژواک، ۸ غبرګولی ۹۹): د پژواک د پرلیکه نظرپوښتنې۸۵ سلنه ګډونوال د ډاکټرنجیب قبر ته د ملي امنیت شورا سلاکار حمدالله مُحب ورتګ ښه کار ګڼي،خو ۱۵ سلنه نور ورسره مخالف دي.
طالبانو پخوانی ولسمشر ډاکټر نجیب الله او د هغه ورور شاپور احمدزی د ۱۹۹۶ میلادي کال د سپټمبر پر ۲۷مه هغه مهال ووژل کله چې کابل ته ننوتل. طالبانو د نجیب او د هغه د ورور مړي د کابل په اریانا څلور لارې کې د خلکو د نندارې لپاره راځړولي وو.
د افغانستان د ملي امنیت شورا سلاکار ډاکټر حمدالله محب د غبرګولي په شپږمه د پکتیا ولایت د امنیتي وضعیت ارزونې پرمهال د پخواني ولسمشر ډاکټر نجیب قبر ته ورغلی و.
مُحب بېګاه پر خپله ټویټرپاڼه کې لیکلي:«ما په اختر کې د هېواد د هغو دوو تاریخي شخصیتونو له مقبرو زیارت وکړ، چې زما کورنۍ ورسره په تېر کي د نظر اختلاف لاره، خو د واقعي سولې لپاره باید زغم او د مخکنیو طبقه بندي شويو تعریفونو څخه تېر شو.»
هغه زیاتوي:« نننی افغانستان د هغو بېلابېلو باورونو څخه جوړ دی، چې پخوا د یو بل ضد ول، مګر نن ټول تر یوه نظام لاندې، د یوه بېرغ او یوه افغانستان لپاره کار کوي.»
د حمدالله محب دغه ګام د غبرګونونو ترڅنګ د یوشمېر کسانو هرکلی له ځان سره لري.
پژواک خبري اژانس پر خپله فېسبوکپاڼه له خلکو پوښتلي چې د ملي امنیت سلاکار ډاکټر حمدالله محب لومړی افغان لوړ پوړی چارواکی دی، چې د پخواني ولسمشر ډاکتر نجیب الله قبر ته ولاړ او دعا يې وکړه، تاسو د ډاکټر محب دغه کار سره موافق یاست؟
په نظرپوښتنه کې۴۷۴۰۰ کسانو برخه اخیستې ده.
له دغو کسانو۸۵ سلنه ویلي چې د حمدالله محب له دغه کار سره موافق دي، خو ۱۵ سلنه نورو کسانو بیا مخالفت ښودلی دی.
د یادونې ده چې دغه نظرپوښتنه په انلاین بڼه ترسره شوې او د سروې معیارونه نه شي پوره کولای.
د سروې ۱۵۰۰ ګډونوالو په دې اړه بېلابېلې تبصرې کړې دي.
موافق
قریب الرحمن مشال لیکلي:«نجیب چې هر څه و اوس مړ دی او د هېواد ولسمشر پاتې شوی دی، موږ باید د هېواد د عزت او د هغه قوي نړیوال شهرت چې د ده نظام درلود په خاطر ورپسې بد ونه وایو، تر ده به عادل او ظالم دواړه ډلې تېرې شوې وي، په کار ده چې ټول په بد نوم یاد نه شي او د مغفرت لپاره یې رب ته دعاء وشي.»
نصیر احمد مجاهد لیکلي:«که څوک ځانته افغان وايي بايد دا کار وستايي،شهيد نجيب يو زړور او وطندوسته افغان و د وطنفروشانو او غلامانو په ذريعه د پنجاب په امر شهيد شو،افغان بايد د پنجاب سره د نفرت د اظهارولو په خاطر دا کار بايد وستايي او د هېواد نور سياسي مشران هم بايد دا افغان دوستي او وطندوستي وښيي او د شهيد مقبرې ته ورشي، تر څو پنجاب ته دا ثابته کړي چې دلته هر افغان نجيب دی، دلته هر سياسي وطندوسته مشر شهيد نجيب دی، دلته هر افغان د ډيورنډ غوښتونکی دی.»
جلوه تسکین لیکلي:«موافق به هغه څوک نه وي چې د دروغو مجاهلین، غلامان، وطن فروشان او خایینین دي هغه څوک به یې ملاتړ او هرکلی کوي چې خاورې او ملت ته ژمن وي، محب هم دشهید داکتر نجیب په نقشِ قدم روان دی خود به د خپل ایډیال قبر ته ورځي او دعا به کوي، شهید رهبر ته مې د خدای جنتونه ورکړي او محب د وطندوستۍ حس د تل همداسې ژوندی وي، ژوند ژوند د هېواد اتله!»
د ډاکټر نجیب لور هیلې نجیب د محب له دغه کار څخه تود هرکلی کړی.
هغې پرخپله ټویټرپاڼه لیکلي: «زه د ښاغلي محب او ښاغلي شمیم کټوازي صاحب نه ډېره مننه کوم چې زما د پلار او زما د تره مقبرو ته ورغلي وو. خدای دې زما د پلار او تره په حق کې ستاسې دعاګانې قبولې کړي او خدای دې وکړي چې زموږ هېواد ته يوه دايمي سوله راشي. کور مو ودان.»
مخالف
احمد مباشر بیا لیکلي:« فکر کوم دا کار د يو نيم ميليونه شهيدانو روح سره جفا وي؛ ځکه چې همدا نجيب اونجيبيان وو چې ډېر بې ګناه خلک يې شهيدان کړل، پوليګونونه ددې ادعا ګواه دي.اخرت کې به هغو ته څه ځواب وايي.»
سردارولي لیکلي:« زما په نظر نجيب دانساني کرامت او درناوي مستحق هم نه دى، پاتې لا د هغه کندې ته لاسونه پورته کول...، نجيب يو وحشي، قاتل، جنګي مجرم د مظلومو افغانانو وينه څښونکى او داړونکى ځناور و چې ټول عمر يې له دغه وحشت او ظلم څخه خوند اخیستى او کله يې چې خپل شوم انجام ترسترګو شو نو د فرعون په څېر يې د موسى په رب باندې د ايمان دعوې پيل کړې.»
ده همدارنګه لیکلي:« که زما په زړه کې نجيب ته نرمي پيدا شي، نو زه به د رب په وړاندې شهيد موسى شفيق، شهيد ميوندوال، شهيد نيازي، شهيد مولوي حبيب الرحمان، شهيد انجينر حبيب الرحمان، شهيد نصرتيار، شهيد عطيش، شهيد توانااو دکونړ دکرهالې د دوولس سوه شهيدانو په ګډون هغه لسګونو زره شهيدانو ته څه ځواب وايم چې نجيب او دنجيب په امر تر خاورو لاندې شوي دي، څوک چې انساني او افغاني وجدان او ضمير ولري، هغه کله هم دنجيب لپاره په زړه کې مينه نه شي درلودی، دنجيب او دهغه له فکر سره دښمني زما دايمان، اسلاميت او افغانيت غوښتنه ده.»
عبدالمالک هم لیکلي:« زۀ خو ورسره مخالف یم، ځکه چې حمدالله محب دداسې چا قبر ته دعا وکړه چې هغه د زرګونو بې ګناه افغانانو قاتل و.»
غړيYou need to subscribe to view the full article. Please login or register a new account.
