کابل (پژواک، ۹ تله ٩٩): د ځینې جهادي ګوندونو، سیاسي او مدنې ټولنو ګډه شورا ګواښ کوي چې که حکومت د ډاکټر نجیب الله د یادغونډې مخه ونه نیسي، دوی به یې د مخینوي لپاره اقدام وکړي او مسوولیت به یې د حکومت پر غاړه وي.
ډاکتر نجیب الله چې پخوا د (خاد) رئیس و، په ۱۳۶۵ کال کې واک ته ورسېد او وروسته له پنځو کلونو حکومت څخه کله چې په ۱۳۷۱ کال کې د مجاهدینو ځینو ډلو کابل ونیو، په کابل کې یې د ملګرو ملتونو دفتر ته پناه یووړه او کله چې په ۱۳۷۵ کال کې طالبانو کابل ونیو، په هماغه ماښام یې نجیب او د هغه ورور شاهپور احمدزی ووژل او د کابل په اریانا چوک یې ځوړند کړل.
د نجیب پلویانو غوښتل چې سږ کال د تلې په پنځمه د لومړي ځل لپاره کابل کې د لویې جرګې په خېمه کې د هغه په یاد غونډه جوړه کړي، خو یو شمېر ګوندونو د دې غونډې له جوړېدو یوه ورځ مخکې یوې ګډې اعلامیې په خپرولو سره له حکومته وغوښتل چې د نجیب یادغونډې ته اجازه ورنه کړي.
د تلې په پنځمه دغه غونډه جوړه نه شوه، خو اوس د نجیب پلویانو ویلي چې سبا (پنجشبنه) دغه غونډه جوړوي.
خو نن د جهادي ګوندونو، سیاسي او مدنې ټولنو یوې ګډې شورا کابل کې په یوه خبري ناسته کې له حکومت څخه بیا وغوښتل چې د لویې جرګې په خېمه کې د ډاکتر نجیب الله د تلین نمانځلو ته اجازه ورنه کړي.
د ازادګانو بنسټ مشر او د کابل پوهنتون د حقوقو او سیاسي علومو استاد موسی فریور په دغه ناسته کې وویل، یو شمېر هغه کسان چې فرهنګ، خلکو او د هېواد ازادۍ ته ژمن نه دي هڅه کوي چې « دخلکو د قاتل داکتر نجیب» د تلین غونډه جوړه کړي.
ده زیاته کړه، حکومت باید د جهاد درناوي او د سولې پروسې کې د خنډونه نه رامنځته کولو لپاره د نجیب په یاد د هر ډول غونډو د جوړېدو مخه ونیسي.
د ده په وینا، د نجیب الله لپاره د هر ډول غونډې جوړولو د مخنیوي لپاره باید حکومت اقدام وکړي؛ ځکه چې د جهاد او شهیدانو پر وړاندې بی حرمتي ده او په اړه یې د حکومت غلې پاتې کېدل یې د ملاتړ په معنا دي.
فریور چې یادې شورا په استازیتوب یې خبرې کولې، ګواښ وکړ چې که حکومت د نجیب د تلین غونډې د مخنیوي لپاره اقدام ونه کړي دغه شورا به یې د مخنیوي لپاره اقدام وکړي او که هر ډول ستونزه رامینځته شوه مسوولیت به یې د حکومت پر غاړه وي.
د حزب اسلامي استازي همایون جریر هم په نننۍ ناسته کې وویل چې د هېواد له ارزښتونو څخه ملاتړ د ټولو هېوادوالو دنده ده، خو ځيني کسان غواړې یو ځل بیا د نجیب په یاد د غونډو په جوړولو سره د کمونیزم فلسفه او فکر را ژوندی کړي.
ده وویل، د دغه ډول غونډو جوړولو ته د ځوانانو هڅول یوه استخباراتي برنامه ده او غواړې چې له دې لارې د سولې خبرې له خنډ سره مخ کړي؛ نو ځکه یې د جهادي ګوندونو، سیاسي او مدنې ټولو شورا د مخنیوي لپاره هڅه کوي.
جریر وویل چې دوی د بیان له ازادۍ او سوله ییزو غونډو له جوړولو سره مخالفت نه لري، خو د هغو کسانو پر وړاندې مقاومت کوي چې موخه یې د کمونیزم د فکر را ژوندی کول دي.
د حرکت انقلاب اسلامي ګوند مشر مولوی قلم الدین هم په نننۍ ناسته کې وویل چې ځوانان تل د استخباراتي لوبو قرباني کیږي او مخکې له دی چې ځان خبر کړي د مفرضو کړیو په دامونو کې لویږي.
ده زیاته کړه:« یو شمير کسان وایي، چې ډاکتر نجیب هېواد ته ژمن و، هغه هیڅ هېواد ته ژمن نه و، که چېرته یې هېواد ته ژمنتیا درلودی نو سلګونه کسان به یې یو ځای ژوندي نه خښول.»
ده له ځوانانو وغوښتل چې د افغانستان تاریخ مطالعه او ځانونه پوه کړي ترڅو د نورو «شومو» اهدافو قرباني نه شي.
د دعوت اسلامي ګوند په استازیتوب سمیع الله نوري په نننۍ ناسته کې خبرې وکړې، ویې ویل چې دوی له ډاکټر نجیب سره مخالف نه دي، خو د هغه له فکر سره مخالف دي.
ده زیاته کړه:«اوسنی حکومت د مجاهدینو په زور او له برکته جوړ شوی، حکومت باید اجازه ورنه کړي چې د نجیب تلین و نمانځل شي؛ که چېرته یې اجازه ورکړه دا معنا ورکوي چې حکومت د مجاهدینو او د شهیدانو تویو شویو وینو ته درناوي نه لري.»
ده وویل، لومړی د حکومت دنده ده چې د دغه ډول غونډو جوړلو مخه ونیسي او که یې مخه و نه نیوله دوی به هڅه وکړي چې د نجیب د تلین نمانځلو په موخه د غونډې جوړلو ته اجازه ورنه کړي.
غړيYou need to subscribe to view the full article. Please login or register a new account.
