جلال اباد (پژواک، ۱۷ لړم ۹۹): د ننګرهار د کرنې رياست وايي، هڅه يې پيل کړې چې پانګوال او مرستندويې ټولنې له بزګرانو او بڼوالو سره د کرنيز سکتور د ودې لپاره مرستې او پانګونې ته وهڅوي.
د کرنې ادارې په همدې موخه د لړم په ۱۹مه په جلال اباد ښار کې د کرنې او مالدارۍ پانګونې په ملاتړ دوه ورځنی کنفرانس هم پرانيست چې په کې د کرنې وزارت، ننګرهار ولایت چارواکو، سوداګرو، مرستندويه ټولنو پر استازو سربېره په کې ګڼو مالدارانو، باغدارانو او کروندګرو برخه اخیستې ده.
د کرنې رياست وايي، په دغه کنفرانس کې به سوداګرو ته په ننګرهار کې د کرنې او مالدارۍ په برخه کې د پانګونې فرصتونو په اړه معلومات ورکړل شي او وبه هڅېږي چې په دې برخه کې خپله پانګونه وکړي.
د ننګرهار د کرنې او مالدارۍ رييس انعام الله ساپي چې په دغه کنفرانس کې يې خبرې کولې، وويل، په دغه دوه ورځني کنفرانس کې به د کرنې په برخه کې د دولتي، خصوصي او مرستندويه ادارو مسوولين په کرنيز سکتور کې شته ستونزې او غوښتنې معلومې کړي.
دی وايي، د دغو ستونزو په حل کې به يې لازم اجراات ترسره شي او هم به سوداګر، د کرنې وزارت، مرستندويې ټولنې او پانګه اچوونکي وهڅېږي چې په دې برخه کې پانګه اچونه وکړي او له کروندګرو، باغدارانو او مالدارانو سره مرسته وکړي.
د ننګرهار والي ضياءالحق امرخېل خوښي وښوده چې د کرنيز سکتور ودې او پانګونې ملاتړ په موخه دولتي، کورنۍ او بهرنۍ ادارې د ستونزو حل په موخه راټولې شوې دي.
امرخېل وويل چې افغانان فقر ځپلي او داسې پروګرامونه چې په هغو کې د کاروبار پيدا کولو، حلالې نفقې ګټلو او يو فاميل ته د ډوډۍ ورکړې زمينه برابرېږي، مهم دي او بايد په دې برخه کې زياته پاملرنه وشي.
نوموړي خصوصي سکتور له لوري د شنو خونو په جوړولو، حصارشاهي صنعتي پارک کې د لمريزې برېښنا زمينې په برابرېدو، د ماليې پر کمولو، د سوداګرو امنيت خونديتوب او په کرنيز سکتور کې په ګڼ شمېر نورو سهولتونو رامنځته کېدو ډاډ څرګند کړ.
د ننګرهار ولايتي شورا غړي محمد اجمل عمر په تېر او اوس کې د کرنې په برخه کې معلومات وړاندې کړل او له مسوولينو يې غوښتنه وکړه چې د کرنې په برخه کې لازم فرصتونه رامنځته کړي.
هغه نيوکه وکړه چې لا هم د ننګرهار په څېر کرنيز ولايت کې خلک د خپلې سيمې غنم، جوار او نور سبزيجات په پوره توګه نه شي ترلاسه کولی او له نورو سيمو دلته راوړل کېږي.
د ياد کنفرانس په دويمه برخه کې د کرنې او مالدارۍ برخو ملاتړ کوونکو ادارو د خپلو فعاليتونو په اړه معلومات وړاندې کړل، د مالي او تخنيکي ملاتړ په برخه کې يې د کرنيز سکتور کاروباريانو ته د همکارۍ ډاډ ورکړ.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن