کابل (پژواک، ١٨ لېندۍ ٩٩) : د افغانستان د ملي امنيت شورا وايي چې د اووه زره نورو طالب بنديانو خوشي کول د سولې پروسې چټکتيا ته هېڅ ګټه نه رسوي.
د ملي امنيت شورا وياند مولوي رحمت الله اندړ د لېندۍ په ١٨مه په يوه ويډويي پيغام کې دا خبرې وروسته له هغه وکړې چې په کابل کې د امريکا سرپرست سفير روس ويلسن دوه ورځې مخکې په يوه خبري کنفرانس کې وويل چې طالبان د خپلو اوو زرو نورو بنديانو خوشي کېدل غواړي.
خو مولوي اندړ وايي، د افغانستان حکومت تېر ځل هم ٥٥٠٠ طالب بنديان د دې لپاره خوشي کړل چې تاوتريخوالى به کمېږي او خوشي شوي کسان به بيا د جګړې ليکو ته نه ځي.
خو هغه زياتوي چې د یادو بندیانو خوشي کولو نه يواځې دا چې د سولې پر چټکټيا اغېزه ونه کړه، بلکې حکومت د خلکو تر سختو نيوکو او اعتراضونو لاندې راغی او او دا لړۍ لا هم روانه ده.
دى وايي، د دغو بنديانو خوشي کولو په بدل کې بايد تاوتريخوالى کم شوی وای او طالب بنديان د جګړې ليکو ته نه واى تللى، خو نه تاوتريخوالى کم شو او نه هم له جګړې را وګرځېدل.
پرون د ولسمشر وياند صديق صديقي هم په يوه خبري کنفرانس کې وويل چې د اووه زره نورو طالب بنديانو خوشي کول لا له وخت څخه مخکې خبره ده.
هغه زياته کړه چې دا په قطر کې د سولې پروسې په پرمختګ پورې تړاو لري، کله چې د سولې پر اجنډا او نورو موضوعاتو پرمختګ وشي، بيا پر دې خبره کېږي.
د افغانستان ولسي جرګې هم پرون د نورو طالب بنديانو له خوشي کولو سره مخالفت وښود او اندېښنه یې څرګنده کړه.
بلخوا د طالبانو د قطر دفتر وياند ډاکتر نعيم وايي چې د نورو بنديانو خوشي کول، د بنديزونو او له تور لېست څخه د دوى د مشرانو لرې کول د دوحې تړون برخه ده چې بايد عملي شي.
Visits: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن