کابل (پژواک، ١٣ سلواغه ٩٩): د هندوستان پوليسو دوه افغانان د شاوخوا يونيم ميليون امريکايي ډالرو په ارزښت له نشه يي توکو سره نيولي دي.
د هندي رسنۍ (اى اېن اى) د راپور له مخې، دغه افغانان د نوي ډيلي په اندراګاندي هوايي ډګر کې هغه مهال ونيول شول چې له دوبۍ څخه په يوه الوتکه کې هلته تللي وو.
سرچينو زياته کړې چې دوى له ځان سره په ٢٠٨ کپسولونو کې ١،٦٣ کيلوګرامه هيرويين قاچاق کړي وو.
په راپور کې راغلي چې د نيول شوو نشه يي توکو ارزښت ١١٤ ميليونه هندي کلدارې دی چې معادل یې شاوخوا يونيم ميليون ډالر کېږي.
د نوي ډيلي هوايي ډګر د ګمرک مسوولينو د نشه يي توکو د قاچاق قانون له مخې، پر دواړو نيول شوو کسانو دوسيه جوړه او محکمې ته یې راجع کړې ده.
د يادونې ده، له دې مخکې هم ګڼ شمېر افغانان هندوستان ته د نشه يي توکو د قاچاق په تور نيول شوي دي.
Visits: 34
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن