خلک: له سولې مخکې د امریکايي ځواکونو له وتلو سره ښايي افغانستان کې کورنۍ جګړه پیل شي

کابل (پژواک، ۲۶ وری ‍۱۴۰۰): یو شمېر هېوادوال له افغانستانه د بهرنیو ځواکونو پر مسوولانه وتلو د ټینګار ترڅنګ وايي، د طالبانو او حکومت ترمنځ له توافق مخکې د یادو ځواکونو وتل ښايي په هېواد کې د داخلي جګړې پیلېدو لامل شي.

خو یو شمېر نور بیا له افغانستانه د بهرنیو ځواکونو د وتلو هرکلی کوي او وايي، د هېواد امنیتي سرتېري د امنیت ټینګولو توان لري.

د راپورونو له مخې، د امریکا ولسمشر جو بایډن تېر ماښام اعلان وکړ چې د روان کال تر سپټمبر میاشتې به ټول امریکایي سرتېري له افغانستانه وباسي.

دغه راز ناټو هم اعلان کړی چې سرتېري يې له امریکايي سرتېرو سره یو ځای افغانستان ته داخل شوي او یو ځای به له افغانستانه ووځي.

هېوادوال د دغو سرتېرو پر مسوولانه وتلو ټينګار کوي او نه غواړي په هېواد کې یو ځل بیا د جګړې نوی باب پرانیستل شي.

د هرات ولایت اوسېدونکي پرویې وویل، د افغانستان اوسنیو حساسو شرایطو ته په کتو به له هېواده د بهرنیو ځواکونو وتل د تازه جګړې لامل شي. ‌

هغه زیاته کړه، د بهرنیو ځواکونو په وتلو به افغانستان یو ځل بیا خطرناکې داخلي جګړې ته داخل شي او ښايي دغه هېواد د نړیوالو ترهګرو پر ځاله بدل شي.

د نعمان دوست په نوم یوه فېسبوک کاروونکي لیکلي: ((د شوروي ځواکونو له وتلو وروسته افغانستان کې جګړه ختمه نه شوه او پایله یې د زرګونو افغانانو وژل او افغانستان ویراني شوه، نظامي قوت او د افغانانو عزت لیلام شو او ګټه یې ګاونډیانو ته ورسېده.))

هغه زیاته کړه، ښايي د امریکايي ځواکونو له وتلو وروسته جګړه پای ته ونه رسېږي، هېواد ویجاړ شي او یو ځل بیا وضعیت د ګاونډیانو په ګټه تمام شي.

د هغه په خبره، له تېر تاریخه باید درس واخلو، یو بل غېږ کې ونیسو او د هېواد پر ټپونو پټۍ کېږدو؛ ځکه افغانستان نور د ویجاړېدو توان نه لري او د دې ځمکې میندې له دې ډېر د دردونو زغم نه لري.

د هرات بل یوه اوسېدونکي فرید وویل: ((که څه هم یوه ورځ باید بهرني ځواکونه زموږ له هېواده بهر شي، خو امریکا اوس بیړنی عمل کوي، امریکا طالبانو ته مشروعیت ورکړ، او قوي یې کړل، اوس خپله پښه له میدانه باسي، دا ډېره د اندېښنې وړ ده چې افغانستان بیا د دې ډلې په لاس سقوط نه شي.))

هغه زیاته کړه، امریکا باید له افغانستانه له وتلو مخکې له طالبانو او پلویانو یې ژمنه واخلي چې سوله کوي او افغانستان د تروریستي ډلو پر ځاله نه بدلوي او وروسته دې له افغانستانه ووځي.

د کابل ښار اوسېدونکي فضل الربي عزیزي پژواک ته وویل: ((په اوسنیو شرایطو کې د بهرنیو ځواکونو وتل به نه مهارېدونکې داخلي جګړې ته لار برابره کړي.))

د نوموړي په باور، په تېرو دوو لسیزو کې افغان سیاسیون او مشران نه دي توانېدلي چې د خلکو له ملاتړ برخمن حکومت جوړ او د ټولو هېوادوالو باور ترلاسه کړي، د ناټو او امریکا چټک وتل به پر افغان حکومت او خلکو منفي تاثیر ولري.

هغه وویل، غوره به دا وه چې د ملګرو ملتونو امنیت شورا په ضمانت په افغانستان کې د ټولو ډلو ترمنځ له واقعي سولې وروسته امریکا او ناټو په مسوولانه توګه له افغانستانه خپل سرتېري ایستلي وای.

د بغلان اوسېدونکي محمد عالم علمي وویل: «د امریکایانو غیر مسوولانه وتل به د کورنیو جګړو د پیل لامل شي او مسوولیت یې امریکا او ملاتړو ته ور ګرځي چې په داسې شریطو کې وتل جفا ده.»

د مثبت یک ټولنیز سازمان رییس خلیل الله شنکر پژواک ته وویل: «دا وتل غیر مسوولانه، غیر شرفتمندانه او د نړۍ په تاریخ کې له ډیپلوماتیک حسنه لرې دي...»

حاجي مطیع الله د اندېښنې په څرګندولو سره وویل چې له طالبانو سره له موافقې مخکې د بهرنیو ځواکونو وتل د تېرې ترخې تجربې تکرار دی.

هغه ​​له امریکا وغوښتل چې له افغانستان سره د ستراتیژیک تړون پر اساس دې عمل وکړي او په بېلابېلو برخو کې خپلو همکاریو ته دوام ورکړي؛ ځکه چې افغانان د دوی دوامداره همکاري غواړي.

د بدخشان اوسېدونکو استازي عبدالبصیر وثیق وویل چې له افغانستان څخه د بهرنیو ځواکونو په وتلو سره به امنیتي ځواکونه له ترهګرو ډلو سره د مبارزې لپاره یوازې پاتې شي.

د هغه په ​​وینا، له دې سره چې ترهګرې ډلې له بهرنیو هېوادونو اکمالېږي، مبارزه ورسره سخته ده.

هغه په ​​افغانستان کې د امریکا شل کلن شتون ناکام وباله او وویل چې د بهرنيانو په وتلو سره به طالبان د بهرنیو تروریستي ډلو په ملګرتیا سره دغه هېواد په اسانۍ سقوط کړي.

د خوست اوسېدونکی صادق الله وویل: "په اوسنيو شرایطو کې د بهرنیو ځواکونو وتل نه یوازې د افغانستان په ګټه، بلکه د سیمې هېوادونو په ګټه هم نه دي.»

د هغه په ​​وینا، غیر مسووولانه وتل به د کورنیو، قومي او مذهبي جګړو لپاره لاره هواره کړي او د تېر په څېر به افغانستان بیا ویجاړ شي.

له افغانستانه د بهرنیو ځواکونو په بشپړ وتلو بې باوري

د ګردېز اوسېدونکي شریف پکتین وویل، ډاډه نه دی چې د متحده ایالتونو په ګډون ټول بهرني سرتېري به له افغانستانه ووځي.

هغه د افغانستان بهرنیو ځواکونو پر ماموریت نیوکه وکړه او زیاته یې کړه چې دغه ځواکونه د ترهګرۍ پر وړاندې مبارزه کې پاتې راغلي دي.

هغه وویل: "بهرنیانو په افغانستان کې د پاتې کېدو پر مهال د ترهګرۍ او د هغې د ملاتړو پر وړاندې هیڅ نه دي کړي."

د جلال اباد یو اوسېدونکی محمد امین ستانکزی ډاډه نه دی چې بهرني سرتېري به ډېر ژر له افغانستانه ووځي؛ ځکه د هغه په ​​وینا، د امریکایي چارواکو دا څرګندونې پر افغان حکومت د فشار راوستو په موخه شوې دي.

د امریکایي ځواکونو د وتلو په صورت افغانان چمتو دي څو امنیت تامین کړي.

د سمنګان اوسېدونکي محمودشاه د هېواد امنیتي ځواکونو پر مېړانه د ویاړ کولو ترڅنګ پژواک ته وویل: «دا د ټولو افغانانو هیله ده چې بهرني او امریکایي ځواکونه دې له افغانستانه ووځي؛ ځکه چې اوس د هېواد دفاعي ځواکونه کولای شي د دښمن پر وړاندې جګړه او د خپل وطن دفاع وکړي.»

د مزارشریف اوسېدونکي محمد معروف د افغانانو پر یووالي ټینګار وکړ او ویې ویل چې د امریکایي سرتېرو ایستلو ناڅاپي اعلان د اندېښنې وړ نه دی؛ ځکه افغانان پوهېږي چې یوه ورځ به بهرني سرتېري له هېواده وځي.

هغه پر مسوولانه وتلو او په هېواد کې د سولې پر ټینګښت ټینګار وکړ او زیاته یې کړه چې اوس باید افغانان سره یو شي، څو د بهرنیو ځواکونو له وتلو وروسته وکولای شي اندېښنې لرې کړي.

هغه طالبانو ته په خطاب کې وویل چې دا فرصت له لاسه ورنه کړي؛ ځکه د هغه په ​​وینا، په افغانستان کې جګړه نظامي حل نه لري، نو دواړه خواوې باید د سیاسي حل لپاره کار وکړي.

په ورته وخت کې ولسمشر محمد اشرف غني پر خپله ټویټرپاڼه لیکلي چې له افغانستانه د ټولو امریکایي ځواکونو وتلو په اړه د امریکا د ولسمشر د پرېکړې درناوی کوي.

هغه لیکلي خپل امریکایي سیال ته ویلي چې افغان ځواکونه له خپل هېواد د دفاع پوره توان لري.