کندهار کې د ملي اردو یوه چورلکه لوېدلې ده

کندهار (پژواک، ۲۰ غویی ۱۴۰۰): په کندهار کې د ملي اردو اړوند د هوايي لوا یوه چورلکه لوېدلې ده.

دغه پېښه تېره شپه شاوخوا ۲ بجې کندهار هوايي ډګر ته څېرمه ارغستان ولسوالۍ ته پر غځېدلي سړک رامنځته شوې ده.

په کندهار کې د ملي اردو ۲۰۵ اتل قول اړوند هوايي لوا یوې سرچینې چې نه یې غوښتل نوم یې خپور شي، پژواک خبري اژانس ته وویل، یادې چورلکې د خرابې هوا له امله سقوط کړی دی.

سرچینې زیاته کړه، په دې پېښه کې چورلکه ویجاړه شوې او دوه پیلوټان یې ټپيان شوي دي.

د یادې سرچینې په وینا، دغه چورلکه د عملیاتو په موخه ارغستان ولسوالۍ ته پر لاره وه چې د هوا خرابوالي له امله لوېدلې ده.

بل لور ته د کندهار حکومتي چارواکو او د دولت وسله والو مخالفينو په دې اړه څه نه دي ويلي.