لغمان کې د هاوان مرمۍ د لګېدو له امله۶ تنه ټپیان شول

مهترلام (پژواک ۲۳ غبرګولی ۱۴۰۰): د لغمان مرکز مهترلام ښار کې د هاوان مرمۍ لګېدو له امله يو سرتېری او پنځه ملکي وګړي ټپيان شول.

چارواکي وايي، توغندي د وسله والو طالبانو له لوري توغول شوي او د مرکز اړوند د سلطان غازي بابا ښارګوټي ساحو کې لګېدلي دي.

د لغمان د امنيه قوماندانۍ وياند شفيع الله افغانيار پژواک اژانس ته وويل چې نن مازیګر ۶ او ۲۰ دقيقې د لغمان د برېښنا امريت ترڅنګ پرله پسې د هاوان دوه مرمۍ لګېدلې دي.

هغه زياته کړه، دغه پېښه کې شپږ کسان ټپيان شوي چې روغتون ته وړل شوي دي.

د لغمان روغتيايي چارواکي وايي چې د پېښې له ځايه ورته شپږ ټپيان انتقال شوي چې يو د عامه ساتنې عسکر او پنځه تنه نور عام وګړي دي.

چارواکي وايي، توغندي وسله والو طالبانو توغولي خو طالبانو په دې اړه څه نه دي ويلي.

تېره شپه هم د دغه ولايت اليشنګ ولسوالۍ کې هم په يو کور د هاوان مرمۍ پرېوتې وه چې د ښځو او ماشومان په ګډون يې پنځه کسان وژلي او يو نارينه ټپي دی.