په مزارشریف کې د وسله وال برید له امله پنځو کسانو ته مرګ ژوبله واوښته

مزارشریف (پژواک، ۳ چنګاښ ۱۴۰۰) : د بلخ ولایت په مرکز مزارشریف ښار کې نن غرمه د وسله وال برید له امله دوه کسان وژل شوي او درې تنه ټپیان دي.

د پېښې عیني شاهدان وایي چې وسله وال په یو هایلکس موټر کې سپاره وو او په سید اباد څلور لارې کې یې پر یادو کسانو ډزې وکړې.

د سید اباد څلورلارې یوه هټیوال محمد علي پژواک ته وویل چې دغه پېښه د یوې قیلون خانې مخې ته رامنځته شوه.

هغه زیاته کړه چې بریدګرو قیلون خانې ته څېرمه پر ولاړو کسانو ډزې وکړې او بیا وتښتېدل.

په بلخ کې یوې امنیتي سرچینې هم دغه پېښه تایید کړه.

د بلخ د پولیسو ویاند عادل شاه عادل هم وایي چې پېښه کې دوه کسان وژل شوي او درې نور ټپیان دي. هغه په دې تړاو نور جزییات ورنه کړل.

د برید مسوولیت هم تر دې مهاله چا نه دی منلی.