د میدان وردګو په سیداباد کې د پولیسو روزنیز مرکز طالبانو نیولی

میدان ښار (پژواک، ۱۳ چنګاښ ۱۴۰۰): د میدان وردګو د سیداباد ولسوالۍ اړوند د ټوپ په دښته کې د پولیسو تعلیمي مرکز طالبانو نیولی او دولتي ځواکونو له دغه مرکزه شاتګ کړی دی.

د طالبانو ویاند ذبیح الله مجاهد وایي چې د ټوپ په دښته کې د دولت «غټه قرارګاه او د پولیسو اکاډمي» طالبانو نیولې ده.

د ټوپ سیمې یوه اوسېدونکي چې نه غواړي نوم یې څرګند شي، پژواک خبري اژانس ته وویل چې پر دغه تعلیمي مرکز تېره ورځ جګړه وشوه، دواړو لورو ته تلفات واوښتل او وروسته دولتي ځواکونه لوګر خوا ته پر شا شول او دغه مرکز د طالبانو لاس ته ورغی.

هغه وویل چې په یاده جګړه کې دوه طالبان وژل شوي او څو نور ټپیان دي او د دولت لوري ته هم مرګ ژوبله اوښتې، خو کره شمېره یې ورته معلومه نه ده.

دغه سرچینه وایي چې د دولت د لوري مړي سره صلیب لېږدولي دي.

د ده په وینا، د سیمې ځینې کورنۍ د جګړې له وېرې نورو سیمو ته تللې وې، خو اوس بېرته خپلو کورونو ته د ورتلو په حال کې دي.

د میدان وردګو ولایت امنیه قوماندان مصطفي مایار هم رسنیو ته ویلي چې دولتي ځواکونو له یاد مرکزه شاتګ کړی.

دا مهال د دغه ولایت له نهو اداري واحدونو د سیداباد، چک، جغتو، دایمیرداد (جلګه) جلریز او نرخ ولسوالۍ او د ولایت د مرکز اړوند ځینې سیمې د طالبانو په کنټرول کې دي.