مزارشریف (پژواک، ۱۷ چنګاښ ۱۴۰۰): د بلخ ولایت په بلخ ولسوالۍ کې هوایي بریدونو کې ملکي وګړو او وسله والو طالبانو ته د مرګ ژوبلې اوښتو ادعا شوې ده.
د بلخ ولسوالۍ ځایي سرچینې وایي چې تېره ورځ د دې ولسوالۍ په بازار کې د مستریانو سرای په نوم سیمې باندې هوایي برید کې ۴ ملکیان وژل شوي او ۸ نور ټپیان دي؛ خو شاهین قول اردو بیا وایي چې په یاد برید کې ۸ طالبان وژل شوي او د هغوی موټربم یې هم له منځه وړی دی.
د بلخ ولسوالۍ اوسېدونکی رحمت الله چې د تېرې ورځې هوایي برید کې یې یو د تره زوی وژل شوی او ورور یې ټپي دی، د چنګاښ به ۱۷مه پژواک اژانس ته وویل چې د پېښې په وژل شوو او ټپیانو کې ماشومان هم شامل دي.
هغه زیاته کړه، هوایي برید وروسته له هغه وشو چې د طالبانو له خوا نیول شوې د ملي اردو یو رینجر موټر دغه سرای ته راوستل شو.
رحمت الله زیاته کړه چې سرای ته د طالبانو موټر له راتلو سره سم هوایي برید وشو.
هغه وویل: "په دغه برید کې یو رینجر موټر او تراکتور ویجاړ شول، ۴ مستریان ووژل شول او ۸ تنه نور ملکیان ټپیان شول."
د بلخ ولسوالۍ د بازار یوه اوسېدونکي معروف پژواک ته وویل چې په پرونۍ پېښه کې یې د مستري غوث الدین په نوم یو ګاونډی وژل شوی دی.
هغه وایي چې له وژل شوي مستري غوث الدین څخه درې ماشومان پاتې شول.
په ورته مهال په شمال کې د ۲۰۹ شاهین قول اردو له مطبوعاتي دفتره په خپره شوې اعلامیه کې ویل شوي چې د بلخ ولسوالۍ په یاد هوایي برید کې ۸ طالبان وژل شوي.
په خبرپاڼه کې همدا راز ویل شوي چې په دغه برید کې د طالبانو دوه موټربمونه چې یو رینجر او یو تراکتور وو، له منځه وړل شوي دي.
د شاهین قول اردو ویاند حنیف رضایي وایي چې په یاده پېښه کې د ملکي تلفاتو په تړاو تر دې مهاله دوی ته راپور نه دی رسېدلی.
د یو بل خبر له مخې، شاهین قول اردو ادعا کوي چې د مزار- شبرغان په لویه لار (هېواد) سیمه کې یې د طالبانو پر یو کمربند باندې هم هوایي برید کړی دی.
د قول اردو له خوا په خپره شوې خبرپاڼه کې ویل شوي چې په یاد برید کې یې هم ۱۸ طالبان وژلي دي.
طالبانو تر دې مهاله رسنیو ته د دغو دواړو پېښو په تړاو څه نه دي ویلي.
