ننګرهار کې د شاتو مچۍ روزونکو ته د ۲ ميليون افغانيو په ارزښت تخنيکي وسايل ورکړل شول

جلال اباد (پژواک، ۲۰ چنګاښ ۱۴۰۰): د ننګرهار ولایت کرنې رياست له لوري د دوه ميليونه او شل زره افغانيو په ارزښت د ۲۲ ولسوالیو د شاتو له ۳۰۰ روزونکو سره د وسايلو او د ولسواليو له ۲۵ واحدونو سره د کانګو وينه بهونکې ناروغۍ مخنيوي په موخه د درملو مرسته وشوه.

دا مرستې د چنګاښ په ۲۰مه د ننګرهار ولايت کرنې رياست کې اړوندو کسانو ته ورکړل شوې او چارواکو ډاډ ورکړ چې د دغو تخنيکي وسايلو په ترلاسه کولو به مچۍ روزنکي د شاتو د توليد په کچه کې زياتوالی راولي.

د ننګرهار ولايت مرستيالې حبيبې کاکړ د يادې مرستې د وېش پر مهال وویل چې د شاتو مچيو هر روزنکي يا فارم لرونکي ته موم، د درملو شيندلو پمپ، خوراکه، بوشکې، د شاتو ټولولو پنجې، درې سايزه بوتلونه، د لوګي پمپ، خولۍ، د ملکو لېږدونې قفسچې، د پيوندي ملکو د توليد حجرې او نور وسايل ورکړل شول.

د ننګرهار د کرنې رييس انعام الله ساپي وويل چې د مرکز او ولسواليو له ۲۵ واحدونو سره يې د کانګو ناروغۍ مخنيوي په موخه د نګاوان، درملو شيندلو پمپونو، ماسک، لاس مينځلو مايع او عينکو مرسته وکړه.

ساپی وايي چې دا مرسته يې د شاتو توليد زياتېدو او د لوی اختر په مناسبت په حيواناتو کې د کانګو ناروغۍ مخنيوي په موخه ترسره کړه.

محمد رحيم چې په کوټ ولسوالۍ کې د مچيو پر روزنه بوخت دی او دغلته يې د کرنې رياست له لوري د مچۍ روزلو وسايل ترلاسه کړل، هيله يې څرګنده کړه چې د شاتو په توليد کې به څو برابره زياتوالی رامنځته شي.

د بټي کوټ ولسوالۍ اوسېدونکی رحمت الله چې د څارويو د روزنې فارم لري او د کانګو ناروغۍ مخنيوي وسايل يې ترلاسه کړل، وايي، که حکومت مالدارانو ته همدا ډول پاملرنه زياته کړي، نو د پرديو له احتياج او وارداتو وطن خلاصېدلی شي.

د يادونې ده، د ننګرهار د شاتو مچيو په شپږ سوه فارمونو کې د ۴۵زره په شاوخوا کې د مچيو کورنۍ ساتل کېږي چې سږ کال ترې ۵۵۰ ټنه شات ترلاسه شوي وو. د شاتو په دغو فارمونو کې د مېرمنو په ګډون شاوخوا دوه زره کسان په کار بوخت دي.