کابل (پژواک، ۲۲ چنګاښ ۱۴۰۰): ولسمشر اشرف غني د هوایي ځواک ځانګړې قطعې ته د شپنیو عملیاتو پیلېدو امر کړی دی.
له ارګه په یوه خپره شوې خبرپاڼه کې راغلي چې ولسمشر اشرف غني د هېواد له امنیتي او دفاعي ځواکونو سره د ټيلېفوني خبرو په لړ کې پرون مازدیګر د پکتیا د زرمت ولسوال عبدالرحمن فولادي، د هوایي ځواکونو د ۷۷۷ ځانګړې لوا کنډک قوماندان ډګرمن کوثر او د هوایي ځواک د ۷۷۷ ځانګړې لوا «الماس» قوماندان ډګرمن ذکریا سره خبرې وکړې.
سرچینې زیاته کړې، ولسمشر په دغو جلا ټيلېفوني تماسونو کې د هېواد امنیتي او دفاعي ځواکونو، په ځانګړي ډول د هوایي ځواک کارنامې وستایلې، ويې ویل، تاریخ به ستاسو سرښندنې او شجاعت په یاد ساتي.
ولسمشر ویلي: "ټول زما بشپړ ملاتړ له ځان سره لرئ، غوښتنو او وړاندیزونو ته مو پر وخت رسېدګي کېږي."
په خبرباڼه کې راغلي، یادو منسوبینو ولسمشر ته ډاډ ورکړ، ويې ویل، د ژوند تر وروستۍ سلګۍ پورې د هېواد او نظام د دفاع لپاره خپلې سپېڅلې مبارزې ته دوام ورکوو او ستاسو ځانګړې پاملرنه موږ ته قوت او جرئت راکوي.
د دغو ټیلېفوني خبرو ویډیو ارګ خپره کړې، ولسمشر له یادو مسوولینو سره په خبرو کې د هغوی د بشپړ تجهیز ډاډ ورکوي او د ځواکونو د لا ډېر اغېزناک توب لپاره له دې پرېکړې هم خبر ورکړی چې د ځانګړو ځواکونو قطعه او د هوایي ځواکونو ځانګړې لوا به سره یوځای کړي.
ولسمشر ویلي: "خاص قوتونه به مطلق خاص پاتې شي. نوم مو الماس دی [الماس ۷۷۷ لوا] هماغسې به پاتې کېږئ. په عین حال کې به زه خاص قطعه له تاسو سره یو ځای کړم چې وکړای شي هغسې چې تاسې روزل شوي یئ او وروزل شوې 'کار درنه واخیستل شي."
ولسمشر غني له پيلوټانو سره په دې خبرو کې ویلي چې له ځانګړو هوایي ځواکونو به د بار وړلو په څېر ځیني مسوولیتونه کمېږي او تمرکز به یې شپنیو او ځانګړو عملیاتو ته وګرځول شي.
ده زیاته کړې: "ما پرېکړه کړې چې سر له نن څخه به شپني عملیات پیلېږي."
افغان ولسمشر داسې وخت د هوایي ځواکونو پر مټ د جګړې د مسیر بدلولو ډاډ ورکړی چې له ولایتونو د درنو جګړو راپورونه ورکول کېږي.
