مزارشريف (پژواک، ٢٨ چنګاښ ١٤٠٠): د بلخ ولايت په مرکز مزار ښار کې د ماین چاودنې د تښتول شوي ماشوم عبدالروف د کورنۍ څلورو غړو ته مرګ ژوبله اړولې ده.
د بلخ د امنیې قوماندانۍ ویاند عادل شاه عادل پژواک اژانس ته وویل چې د یکشنبې ماښام ناوخته اته نیمې بجې د مزارښار نهمې ناحیې په مربوطاتو کې د تښتول شوي عبدالرووف د پلار حاجي نبي پر موټر د چسپکي ماین چاودنه شوې ده.
هغه وایي چې په پېښه کې د عبدالرووف د تره د زوی په ګډون د هغه د کورنۍ ۲ کسان وژل شوي او ۲ نور ټپیان دي.
د عادل په خبره، د چاودنې هدف د عبدالرووف پلار وو خو نوموړی د پېښې پر مهال په موټر کې نه و.
د امنیې قوماندانۍ ویاند وایي چې په دې تړاو تر اوسه څوک نه دي نیول شوي، خو په وینا یې چې د پولیسو پلټنې روانې دي.
لس کلن عبدالرووف څه باندې لس میاشتې وړاندې په مزارشریف ښار کې د ښوونځي له لارې وتښتول شو.
کورنۍ یې وایي چې تښتونکي ترې د عبدالرووف د خوشي کېدو په بدل کې شاوخوا یونیم ميلیون امریکایي ډالر غوښتي دي.
د ماشوم له تښتول کېدو راپه دېخوا دا دویم ځل دی چې د هغه پر پلار حاجي نبي باندې برید کېږي.
په تېرو لسو میاشتو کې تښتوونکو د عبدالروف کورنۍ ته څو ځلې د هغه د شکنجې او ربړونې ویډیوګانې لېږلې دي.
څو میاشتې وړاندې د افغانستان ملي امنیت ریاست په یوه اعلامیه کې ویلي وو چې د عبدالرووف په تښتولو کې داعش وسله وال لاس لري.
