خوست (پژواک، ۱۷ زمری ۱۴۰۰): ځايي مسوولين وايي چې خوست کې پر يوه کور د هاوان مرمۍ لګېدو له امله دوه ماشومان وژل شوي او د يو سړي په ګډون څلور نور ټپيان شوي دي.
د دغې ولسوالۍ ولسوال محمد اکبر ځدراڼ د زمري په ۱۷مه، پژواک خبري اژانس ته وويل چې دغه پېښه تېر ماښام د دغه ولايت د صبريو يعقوبيو ولسوالۍ د ليوانخېلو په کلي کې رامنځته شوې.
هغه زیاته کړه، تراوسه دا نه ده معلومه چې د هاوان مرمۍ چا ويشتلې، خو زیاته یې کړه چې په سيمه کې د امنيتي ځواکونو او وسله والو طالبانو ترمنځ جګړه روانه وه.
يوې بلې امنيتي سرچينې بيا پژواک اژانس ته وويل چې پر دغه کور د هاوان لګېدلې ياده مرمۍ د وسله والو طالبانو له خوا ويشتل شوې.
سرچينې زياته کړه، وژل شوي او ټپي ماشومان ټول د يوې کورنۍ غړي دي، چی عمرونه يې د څلورو او اتو کلونو ترمنځ دي.
وسله والو طالبانو تراوسه په دې څه نه دي ويلي.
