ولسمشر غني نن سهار په ناڅاپي سفر مزارشریف ته لاړ

مزار شریف ( پژواک، ۲۰ زمری ۱۴۰۰) : ولسمشر غني د یوه جګپوړي پلاوي په مشرۍ نن سهار مزارشریف ته رسېدلی دی.

د ولسمشرۍ مانۍ سلاکار شاه حسین مرتضوي پر خپلې رسمي فیسبوک پاڼې لیکلي چې جمهور رییس غني نن سهار مزارشریف ته رسېدلی دی.

هغه ویلي چې بلخ ته د محمد اشرف غني په سفر سره به شمال کې نوې پاڼه واړول شي.

په بلخ کې یوې معتبرې سرچینې پژواک ته وویل چې ولسمشر به دغلته د شمال زون د عملیاتو یو واحد مرکز هم پرانیزي.

د سرچینې په وینا، محمد اشرف غني به مزار کې له مارشال دوستم او عطامحمد نور سره یو ګډ مجلس هم ولري.

دا په تېره یوه میاشت کې دویم ځل دی چې ولسمشر غني بلخ ته سفر کوي.

په ورته مهال تېره شپه د جنبش ګوند مشر مارشال عبدالرشید دوستم هم له لسګونو تازه دمو ځواکونو سره مزارشریف ته ورسېد.

دوستم ته نږدې سرچینو پژواک ته وویل چې ښایي نوموړی د ولسمشر له خوا په شمال کې د عملیاتو مسوول په توګه وګومارل شي.

ولسمشر غني او مارشال دوستم داسې مهال بلخ ته سفر کوي چې په تېره یوه اوونۍ کې د شمال او شمال ختیځ زون جوزجان، سرپل، سمنګان، بغلان، کندوز، تخار او بدخشان ولایتونو باندې طالبانو خپله ولکه ټینګه کړې ده.