د غني فیسبوک پاڼه هک شوې، د هغه له خوا د طالبانو د ملاتړ څرګندونې ناسمې دي

کابل (پژواک، ۵ تله ۱۴۰۰): مخکنی ولسمشسر غني وایي، فیسبوک پاڼه یې هک شوې او پرې خپره شوې هغه لیکنه ناسمه ده چې په کې راغلي نړیوال دې د افغانستان له اوسني حکومت سره تعامل وکړي او په رسمیت یې دې وپېژني.

د افغانستان د مخکني ولسمشر محمد اشرف غني پر فیسبوک پاڼه – چې د تاییدۍ نښه هم لري – نن لیکل شوي: « دا یو تریخ حقیقت دی چې موږ او زموږ پخوانۍ کابینه په افغانستان کې یوه سلنه واک هم نه لري، خو لاهم په نړۍ کې ځینو هېوادونو پخواني سفیران او استازي د خپلو موخو او په هېواد کې د نوي بحران د رامنځته کولو لپاره هڅوي او نړیوالو غونډو ته یې رابولي، چې په دې ډول د هیڅ قانون له مخي دوی د افغان ولس او حاکم حکومت استازيتوب نه شي کولای. ”

په لیکنه کې زیاته شوې چې په ملګرو ملتونه کې د افغانستان استازی غلام محمد اسحاق زی نن په داسې حال کې د ملګرو ملتونو غونډې ته وینا کوي چې تر شا یې هيڅ حکومت او ولسي ملاتړ شتون نه لري، خو نړیوال د دې پر ځای چې د افغانستان له ملت څخه لرې شي باید له اوسني حکومت سره تعامل وکړي او مرستي ورسره وکړي، د افغان ولس کنګل شوې بودیجه ورکړي او په رسمیت یې وپېژني.

په یاد متن کې راغلي، نړیوال باید درک کړي چي که سوکاله او امن افغانستان غواړي نو د دوستۍ لاس دې ورکړي؛ په دښمنۍ  یې تر خپل اغېز لاندې نه شي راوستلای؛ لکه څرنګه چې په تېرو شلو کلونو کې ورته تجربه شول.

په لیکنه کې دا هم راغلي چې کېدای شي د ده له دغو نظریاتو سره ځیني کسان موافق نه وي، خو زیاتوي: “زه تاسې ته معلوم یم چې سپینې خبرې کوم.”

سرچینه زیاتوي نن چې اسحاق زی د ده په نمایندګي یا د افغانستان په نمایندګي خبرې کوي د “شرم” احساس کوي.

خو محمد اشرف غني پر خپله تویټرپاڼه لیکلي:« د ډاکټر محمد اشرف غني د فیسبوک رسمي پاڼه له پرون راهیسې هک شوې ده، د پاڼې تر بیا تر لاسه کولو لپاره پر دغې پاڼې نشر شوې ټوله محتوا د اعتبار وړ نه ده.»

د غني د حکومت د چارو ادارې فرهنګی رییس محبوب شاه محبوب هم پر خپله فیسبوک پاڼه لیکلي چې د مخکني ولسمشر غني له فیسبوک پاڼې خپره شوې لیکنه د هغه نظر نه دی. محبوب وایي:« یاده پاڼه هیک شوې او زموږ د همکارانو په واک کې نه ده.»