کابل (پژواک، ۱۹ لړم ۱۴۰۰): په پاکستان کې د تکواندو په نړیوالو سیالیو کې افغان لوبغاړو د اووه مډالونو په ترلاسه کولو سره لومړی مقام ګټلی.
په دغو سیالیو کې چې پاکستان کې تر سره شوې، د افغانستان ۱۹ لوبغاړو په دوو ګروپونو کې لوبې وکړې.
د افغانستان د تکواندو فدراسیون ویاند ذبیح الله شهزاد رسنیو ته ویلي چې له افغان لوبغاړو څخه یوه د سرو زرو، درېیو د سپینو زرو او درېیو د ژېړو مډالونه ترلاسه کړي دي.
دی وایي، چې افغان لوبغاړو د نارینه وو په برخه کې د اتلولۍ جام هم خپل کړ.
هغه زیاته کړه چې افغان لوبغاړي بیا له دې پلوه چې د نارینه او ښځینه لوبغاړو مډالونه حساب شي څلورم شول، ځکه چې ښځینه افغانانو په دې سیالیو کې برخه نه لرله.
یادې لوبې درې ورځې مخکې پیل شوې چې په کې د نړۍ د ۱۵هېوادونو څلورسوه دوه ویشت لوبغاړو برخه اخیستې وه.
