کابل (پژواک ۱۰ لیندۍ ۱۴۰۰): د بهرنيو چارو سرپرست وزير د افغانستان لپاره د شپاړسو هېوادونو له "نوماند سفيرانو او استازو" سره په دوحه کې پر بېلا بېلو موضوعاتو خبرې کړې دي.
دغه مطلب د بهرنیو چارو وزارت د ویاند عبد القهار بلخي له خوا په خپره شوې خبرپاڼه کې په ډاګه شوی دی.
په خبرپاڼه کې راغلي چې نن (چهارشنبه) د افغانستان د بهرنيو چارو وزير امير خان متقي په مشرۍ د افغانستان د حکومت پلاوي د افغانستان لپاره د شپاړسو هېوادونو "نوماند سفيرانو او استازو" سره په دوحه کې وکتل.
سرچينه زياتوي، په دې کتنه کې په امنيتي، بشري، اقتصادي، سياسي او صحي موضوعاتو خبرې وشوې.
سرچينه کا.ي، په ناسته کې ټولو خواوو په امنيتي او سياسي حالاتو کې د پرمختګونو ستاينه وکړه، ويې ويل شول چې افغانستان سره بايد بشري او صحي مرستې وشي او همدارنګه ستونزو ته د همکاريو له لارې لاسرسی وشي.
د خبرپاڼې په حواله، د افغانستان پلاوي له خپل لوري ورته د امنيت ډاډ ورکړ، د مرستو رسولو برخه کې یې د همکاريو ژمنه وکړه، غوښتنه يې وکړه چې ټول هېوادونه بايد په کابل کې خپل سفارتونه پرانیزي ترڅو حقيقتونه له نږدې وويني او د مثبتو اړيکو نوی باب پرانيستل شي.
د خبرپاڼې د معلوماتو له مخې، په دې کتنه کې د جرمني، کاناډا، فنلنډ، نیوزیلنډ، ایټالیا، جنوبي کوریا، اروپایي اتحادیې کمیشنرۍ، سپین، امریکا، ناروې، سویډن، نیدرلنډ، استرالیا، انګلینډ او جاپان هېوادونو سفيرانو او استازو ګډون کړی و.
