” یرغلګر دې په افغانستان کې له خپلو ماتو پند واخلي”

کابل (پژواک، ۲۶ سلواغه ۱۴۰۰): افغان حکومت وايي، یرغلګر هېوادونه بايد د څه باندې سلو کلونو په اوږدو کې په افغانستان کې له خپلو پرله پسې ماتو پند واخلي او نور دې له افغان ملت سره د دښمنۍ او کينې لار نه نيسي.

د اطلاعاتو او فرهنګ وزارت له خوا په افغانستان کې د پخواني شوروي اتحاد د ماتې (١٣٦٨ کال د سلواغې ۲۶مه) کاليزې په مناسبت په خپره شوې خبرپاڼه کې ويلي چې د هېوادونو ازادي او هويت د هغوی په مېړانه پورې اړه لري او افغانان دا وياړ لري چې په تېرو څه باندې سلو کلونو کې يې درې ځله یرغلګرو ته ماتې ورکړې ده.

د دغه وزارت په خبرپاڼه کې راغلي:"رښتیا هم چې د هېوادونو ازادي او هویت د هغوی په همت او شهکاریو پورې اړه لري چې الحمدلله په تېرو سلو کلونو کې افغانانو درې ځله په دې میدان کې مثبت امتحان ورکړی او د خپل هېواد ازادي او خپلواکي يې ګټلې او ساتلې ده."

سرچینې دغه راز ليکلي چې اوس هېواد په درېيم ځل تازه له «اشغال» څخه ازاد شوی او زياتوي چې په افغانانو کې د ازادۍ غوښتنې حس لاهم په قوت کې موجود دی او د خپل دین او هېواد د ساتنې لپاره کلک هوډ او ژمنه لري.

خبرپاڼه ليکي: ((موږ هیله من یوو چې د تېرو څه باندې سلو کلونو له پرله پسې یرغلونو او بېرته ازادۍ ګټلو څخه په راتلونکي کې متجاوز هېوادونه ډېر څه زده کړي او نور زموږ له هېواد او ملت سره د دښمنۍ او کینې لار ونه نیسي.))

سرچينه زياتوي چې افغانان په سوله او امن مین خلک دي، خو هرځل يې سوله او امن د بهرنیو یرغلونو او تاړاکونو له امله په جګړه بدل او فرصتونه ورڅخه اخیستل شوي دي.

سرچینې لیکلي:«موږ د بل هيڅ هېواد په حریم او خاوره د تجاوز نیت او اراده نه لرو او له نورو هېوادونو سره هم د متقابل درناوي او په امن کې ژوند کولو تمه لرو.))

خبرپاڼه کې راغلي، د افغانستان مسلمان او غیور ولس باید د تېر په څېر په راتلونکي کې هم د هر ډول توطيئو او دسیسو پر وړاندې ډېر حساس او بیدار واوسي او د خپل کلک اسلامي تعهد او ملي وحدت په ساتلو سره د خپلو نیکونو او پلرونو لار تعقیب کړي او د خپل هېواد ازادي او خپلواکي وساتي.

نن ‏د سلواغې ۲۶مه، له هېواد څخه د پخواني شوروي اتحاد د لښکرو د ماتې او وتلو ورځ ده او دغه  ورځ هر کال په افغانستان کې عمومي رخصتي او نمانځل کېږي.

د يادونې ده چې پخواني شوروي اتحاد د ١٣٥٨ کال د مرغومې په شپږمه پر افغانستان يرغل وکړ او د ١٣٦٨ کال د سلواغې په ٢٦ مه يې خپله ماتې ومنله او له افغانستان څخه بېرته ووت.

غړي

You need to subscribe to view the full article. Please login or register a new account.