کندهار (پژواک، د کب لومړۍ نېټه ۱۴۰۰): په کندهار ښار کې د تېرې ورځې په پېښه کې د وژل شوې مېرمنې زوی وايي، د خپلې مور قاتل نه بښي، یا دې دوی ته وسپارل شي او یا دې د اعدام سزا ورکړل شي.
نوموړي چې نن (د کب لومړۍ نېټه) یې د خپلې کورنیو له نورو غړو سره یو ځای د خپلې مور مړی د ولایت مقام مخې ته د اعتراض په توګه راوړی و، د امنیتي کسانو له خوا د غږ پورته کولو او له رسنیو سره د خبرو کولو اجازه ورنه کړل شوه.
د وژل شوې مېرمنې زوی جانان پژواک خبري اژانس ته وویل، په کورنۍ کې یې د واده مراسم نږدې وو، تېره ورځ یې مور او د هغې دوې نګندې بازار ته د سودا لپاره تللې وې چې کور ته د بېرته راتلو پر مهال یوه امنیتي کس پر هغوی ډزې کړې، د ده مور یې وژلې او د ده دوه وريندارګانې یې ټپيانې کړې دي.
هغه زیاته کړه: ((مور او دوې وريندارګانې مې له بازاره کور ته راتلې، ریکشا چلوونکي ته یې ویلي چې د لمانځه راباندې ناوخته کېږي، پر یوه لنډه لار مو کور ته ورسوه، کله چې ریکشا چلوونکی پر یو طرفه سړک روان شوی، یوه طالب ورته ویلي چې پر دې لار مه ځه! خو هغه ورته ویلي چې پر ښځو ناوخته دی او روان شوی دی، خو طالب راغلی زما مور یې پر سر ویشتلې او زما وريندارګانې یې یوه په لاس او بله په پښه کې ویشتلې دي.))
دی وايي، غوښتل یې چې نن د دغه ظلم خلاف غږ پورته کړي خو د ولایت مقام مخې ته ولاړو امنیتي کسانو اجازه ورنه کړه او فزیکي شخړه یې هم ورسره وکړه.
هغه وویل: ((موږ چې د ولایت مقام مخې ته ورسېدو، زیات شمېر طالبان ولاړ وو، موږ ته یې اجازه نه راکول چې اعتراض وکړو، خبریالان یې هم نه پرېښودل چې زموږ غږ یا عکس واخلي.))
د ده په خبره، د کندهار ولایت مقام مسوولینو ژمنه ورسره کړې چې قاتل ته به د شریعت مطابق سزا ورکول کېږي او غوښتنې به یې منل کېږي.
نوموړي ټینګار وکړ چې په هیڅ توګه قاتل نه بښي، هغه باید دوی ته وسپارل شي او که نه وي نو بیا باید د اعدام سزا ورکړل شي.
بلخوا د کندهار اوسېدونکي هم پر دې پېښه خواشیني دي او له مسوولینو غوښتنه کوي چې د پېښې عاملینو ته سخته سزا ورکړي.
د کندهار ښار د لومړۍ ناحیې یوه اوسېدونکي جمال پژواک خبري اژانس ته وویل، دوه میاشتې مخکې هم ورته پېښه شوې وه، امنیتي کسانو پر یوه موټر ډزې کړې وې چې د یوې کورنۍ ۵ غړو ته یې مرګ ژوبله واړوله خو عاملینو ته یې د سزا هیڅ څرک ونه لګېد.
دی وايي: ((د دې پيښي عاملینو ته باید سخته سزا ورکړل شي، څو بیا داسې پېښه تکرار نه شي؛ څنګه یو طالب پر ښځو مخامخ ټکان کوي؟ دا خو عام بازار دی، نور خلک هم وژل کېدای شوای... د داسې خپلسریو مخه باید په جدي توګه ونیول شي.))
د یادونې ده، د کندهار خبریالانو غوښتل د دې پېښې په اړه شوي اعتراض ته خبري پوښښ ورکړي خو امنیتي کسانو یې مخنیوی وکړ.
د یادونې ده، تېره ورځ ماسپښین شاوخوا درې بجې د کندهار ښار په چهارسو سیمه کې د یوه امنیتي کس له خوا پر یوې ریشکا ډزې وشوې چې په کې یوه ښځه ووژل شوه او د هغې دوې نګندې ټپیانې شوې.
له دې پېښې وروسته د کندهار امنیې قوماندانۍ ویاند محمد اصف حکیمي پژواک ته ویلي وو چې ریکشا پر یو طرفه سړک تله چې د امنیتي کسانو د درېدو له امره یې سرغړونه کړې وه.
د ده په خبره، امنیتي کس غوښتل د خبرداري ډز وکړي، خو په تېروتنه ورڅخه ډېرې ډزې شوې چې له امله یې په ریکشا کې ناستې درې ښځې لګېدلې دي.
ده وویل: «په ریکشا کې له ناستو درېیو ښځو یوه شهیده شوې او دوې نورې ټپيانې دي، د پېښې عامل مجاهد نیول شوی او په توقیف کې دی، بشپړ جزئیات به وروسته له خلکو سره شریک کړو.»
غړي
You need to subscribe to view the full article. Please login or register a new account.
