<p style="text-align: justify;">کابل (پژواک ۴ وری ۱۴۰۱): د افغانستان لپاره د روسيې ځانګړي استازي له ملا برادر سره په کتنه کې ويلي چې ژر به د هغو پروژو عملي کار پيل کړي چې د افغانستان په اقتصادي بیارغونه کې مهم رول لرلی شي.</p>
<p style="text-align: justify;">د روسیې د ولسمشر ځانګړی استازی ضمیر کابلوف نن د یوه پلاوي په مشرۍ په داسې حال کې افغانستان ته راغلی چې د چین د بهرنیو چارو وزیر هم همدا نن کابل ته رارسېدلی دی.</p>
<p style="text-align: justify;">د ریاست الوزراء لومړي معاونيت له خوا په خپره شوې خبرپاڼه کې راغلي چې د رياست الوزراء لومړي مرستيال ملا عبدالغني برادر په چهارچنار ماڼۍ کې د افغانستان لپاره د روسيې له ځانګړي استازي «ضمير کابلوف» او مل پلاوي سره یې نن وکتل.</p>
<p style="text-align: justify;">سرچينه زياتوي، ملا برادر په بشري او امنيتي برخو کې د روسيې له مرستو مننه وکړه او په نړيوالو فورمونو او د ملګرو ملتونو په وروستۍ ناسته کې یې د افغانستان د سرپرست حکومت په اړه د روسي استازي له څرګندونو ستاينه وکړه.</p>
<p style="text-align: justify;">سرچينې د روسي پلاوي د مشر ضمير کابلوف له قوله ليکلي، افغانستان ته یې له دې سفر یوازینۍ موخه د دواړو هېوادونو د اړیکو پیاوړي کول او په هغو برخو کې ګډ کار کول دي چې افغانستان ورته تر نورو ډېره اړتیا لري.</p>
<p style="text-align: justify;">ده زیاته کړه، له تخنیکي بحثونو وروسته به ژر د هغو پروژو عملي کار پيل کړي، چې د افغانستان په اقتصادي بیارغونه کې مهم رول لوبولی شي.</p>
