د ملګرو ملتونو امنیت شورا لس غړي: په افغانستان کې دې د نجونو ټول ښوونځي پرانیستل شي

کابل (پژواک، ۶ وری ۱۴۰۱): د ملګرو ملتونو په امنیت شورا کې د لسو هېوادونو استازو په یوه ګډه اعلامیه کې د افغانستان له سرپرست حکومته غوښتي چې د ټولو افغان نجونو پر مخ د ښوونځیو دروازې پرانیزي.

د دوی په ګډه اعلامیه کې راغلي: «دغه اعلامیه د ملګرو ملتونو د امنیت شورا د دایمي استازو (متحده عربي اماراتو، ناروې، البانیا، برازیل، فرانسې، ګابن، ایرلنډ، مکسیکو، بریتانیا او امریکا متحده ایالاتو) له خوا وړاندې شوې ده.»‎

سرچينې ليکلي چې دغه خبرپاڼه پرون ماسپښين د وري پر ۵ نېټه د امنيت شورا په هغه ځانګړې ناسته کې وړاندې شوې چې د نجونو د لېسو او منځنیو ښوونځیو د نه پرانیستلو په اړه جوړه شوې ده.په خبرپاڼه کې راغلي: «زموږ پیغام روښانه دی: په افغانستان کې ټولې نجونې باید وکولای شي ښوونځیو ته لاړې شي، په دې اوونۍ کې - له یو ملیون ډیرې افغان انجونې چمتو کېدې چې بالاخره بېرته ښوونځیو ته ستنې شي. د دوی هیله په وروستۍ شېبه کې په نا هیلۍ بدله شوه.»په اعلامیه کې راغلي: «دا پرېکړه له هغو ژمنو سره په ټکر کې ده چې پخپله طالبانو په وروستیو اوونیو او میاشتو کې له نړیوالې ټولنې سره د دوی د روان تعامل د برخې په توګه کړې وې. دا کار د ژورې اندېښنې وړه دی.»‎سرچینه لیکي، زده کړه د ټولو ماشومانو نړیوال حق دی. په دې کې د افغانستان نجونې هم شاملې دي.د سرچینې په وینا، د دې لپاره چې افغانستان یو باثباته او امن راتلونکی ولري، نه شي کولای په اسانۍ خپل استعداد او ظرفیتونه له لاسه ورکړي او خپل نیمايي نفوس له زده کړو بې برخې کړي. ښوونه او روزنه د هرې ټولنې د جوړېدو کلیدي عنصر دی.په اعلامیه کې دوی له سرپرست حکومته غوښتي چې د ټولو دورو ښوونځي باید د نجونو او هلکانو پر مخ بېرته پرانیزي او ورته د تعلیم خوندي چاپېریال رامنځته کړي.

دا په داسې حال کې ده چې ټاکل شوې وه په ټول افغانستان کې د نجونو ښوونځي له میاشتو رخصتیو وروسته د وري په ۳مه نېټه پیل شي؛ خو پوهنې وزارت اعلان وکړ چې د نجونو منځني او عالي ښوونځي به تر امر ثاني پورې تړلي وي.

د پوهنې وزارت په خبرپاڼه کې راغلي، هر کله چې د شریعت، د افغانستان دود او کلتور سره سم د نجونو لپاره د ښوونځیو یونیفورم جوړ شي، هغه مهال به د حکومت په حکم د نجونو ښوونځي بېرته پرانستل شي.

په ورته مهال، د وري په درېیمه پوهنې وزارت ویلي وو چې پر یوې داسې طرحې کار شوی، چې له مخې به یې نجونې په اسلامي حجاب او د ښځینه ښوونکو په شتون کې خپلو زده کړو ته دوام ورکړي.